بۇل قىزمەتكەرلەر تالدىقورعان قالاسىنداعى تەرگەۋ يزولياتورىنا جاسالعان شابۋىل كەزىندە جاراقاتتانعان.
ەلىمىزدە بولعان قاڭتار وقيعاسىنا بايلانىستى، جاستار اراسىندا جاۋىنگەرلىك رۋحىن كوتەرۋ، پاتريوتتىق تاربيە بەرۋ ماقساتىندا تالدىقورعان قالالىق 16 ورتا مەكتەبى باسشىلىعى قاج قىزمەتكەرلەرىمەن كەزدەسۋ ۇيىمداستىردى، دەپ حابارلايدى Almaty-akshamy.kz Polisia.kz-كە سىلتەمە جاساپ.
وقۋشىلارمەن كەزدەسۋدىڭ باستى قوناقتارى رەتىندە الماتى وبلىسى بويىنشا قاج دەپارتامەنتىنە قاراستى لا-155/16 مەكەمەسىنىڭ قاڭتار وقيعالارىندا جاراقات العان قىزمەتكەرلەرى ماۋلەن مىرزابەكوۆ جانە ديدار بايبوسىنوۆ قاتىستى. تاربيە ساعاتى انۇرانمەن جانە قاقتىعىس كەزىندە قازا تاپقان قىزمەتكەرلەردى ەسكە الۋ ماقساتىمەن ۇنسىزدىكپەن باستالدى. كەزدەسۋ بارىسىندا قاج قىزمەتكەرلەرى وقۋشىلارعا ەلىمىزگە قىزمەت ەتۋدىڭ باستى قۇندىلىقتارىن ءتۇسىندىرىپ، قويىلعان سۇراقتارعا جاۋاپ بەردى.
«ەرلىك – تابيعاتتىڭ سىيى ەمەس، سانالى اسكەري تاربيەنىڭ جەمىسى، وتان الدىنداعى پارىزىڭدى ورىنداۋ ءۇشىن ءوزىڭدى سانالى تۇردە قاۋىپ-قاتەرگە باس تىگۋگە دايىن بولۋدىڭ ناتيجەسى. ءبىزدىڭ ماقساتىمىز – ەلىمىزگە قىزمەت ەتۋمەن قاتار، جاس ۇرپاقتىڭ وتانعا دەگەن پاتريوتتىق سەزىمدەرىن ارتتىرۋ»، – دەپ اتاپ ءوتتى الماتى وبلىسى بويىنشا قاجد باستىعىنىڭ ورىنباسارى جانىبەك قوسجانوۆ.
جيىن سوڭىندا مەكتەپ باسشىلىعى جانە وقۋشىلار قاج قىزمەتكەرلەرىنە العىستارىن ايتىپ، جىلى لەبىزدەرىن ءبىلدىردى.