كەيبىر جولدا كولىك قوزعالىسىنا شەكتەۋ قويىلدى.
ءتورت وبلىستا رەسپۋبليكالىق ماڭىزى بار بەس جولدى قىزىلسۋ باسىپ جاتىر، دەپ حابارلايدى Almaty-akshamy.kz قازاۆتوجول مەكەمەسىنە سىلتەمە جاساپ.
مامانداردىڭ ايتۋىنشا، اباي، اقتوبە، قوستاناي جانە ۇلىتاۋ وبلىستارىنداعى جولداردا جاعداي كۇردەلى. جالپى رەسپۋبليكاداعى جولداردىڭ باسىم كوپشىلىگىن ەرىگەن قار سۋى الىپ جاتىر.
"اباي وبلىسىنداعى "قاراعاندى – اياگوز – تارباعاتاي - بوعاز" اۆتوجولىنىڭ 707-941 شاقىرىمىندا جەڭىل اۆتوموبيلدەر ءۇشىن شەكتەۋ قويىلدى. جولدىڭ 878 جانە 923 كم-دە ديامەترى 1 مەتر بولاتىن ءبىر نۇكتەلى قۇبىر جانە ەكى ارالىقتى كوپىر بار. جول توسەمىن ساقتاپ قالۋ ءۇشىن جول جيەكتەرى نىعايتىلىپ، جاساندى بىلىكتەر جاسالىپ جاتىر"، - دەيدى قازاۆتوجول ماماندارى.
اقتوبە وبلىسىندا "قاندىاعاش – ەمبى - شالقار - ىرعىز" اۆتوجولىنىڭ 288 شاقىرىمىندا دا وسىنداي جاعداي.
"جولدىڭ وسى ۋچاسكەسىندە ديامەترى 1،5 م بولاتىن ءبىر نۇكتەلى سۋ وتكىزگىش قۇبىر بار، ودان ءارى سۋ اعىنىن بولدىرماۋ ءۇشىن 650 قاپ قۇم توسەلدى. سونىمەن قاتار قوسىمشا 480 توننا قۇم جەتكىزىلدى. تولىپ كەتۋ سالدارىن جويۋ ءۇشىن جول جۇمىسشىلارى جۇمىلدىرىلدى"، - دەيدى ۆەدومستۆوداعىلار.
بۇل جولمەن جۇرۋگە كولىكتىڭ بارلىق تۇرىنە شەكتەۋ قويىلدى.
وسى وبلىستاعى "سامارا-شىمكەنت" اۆتوجولىن دا قىزىل سۋ باسىپ جاتىر. بۇل جولدا جەڭىل اۆتوموبيلدەر ءۇشىن قوزعالىس ۋاقىتشا توقتاتىلدى.
سونداي-اق قوستاناي وبلىسى "جەزقازعان-پەتروپاۆل" اۆتوجولى 269 كم-ى ەرىگەن قار سۋىنىڭ استىندا قالدى.
"بۇل اۋماققا دا قۇبىرلار قويىلدى. جولداعى ۋاقىتشا وزگەرىستەردى بەلگىلەۋ ءۇشىن ۋاقىتشا جول بەلگىلەرى مەن سيگنالدىق باعاندار ورناتىلدى. جول توسەمىن وقشاۋلاۋ ءۇشىن كولەمى 150 تەكشە مەتر ينەرتتى ماتەريال اعاش، قوقىس تاس دايىندالدى. 3 بىرلىك تەحنيكا جانە 9 ادام جۇمىلدىرىلدى"، - دەيدى جول ماماندارى.
ۇلىتاۋ وبلىسىندا دا ءدال وسىنداي جاعداي. "اقشاتاۋ – ورتاۋ - بيدايىق" اۆتوجولىن سۋ باسىپ جاتىر. ءدال قازىرگى ۋاقىتتا رەسپۋبليكالىق ماڭىزى بار قاۋىپسىزدىكتى قامتاماسىز ەتۋ ءۇشىن جالپى سانى 610 بىرلىك تەحنيكا جانە 1558 ادام جۇمىلدىرىلدى.