جاساق ءوز قىزمەتىن قازاقستان رەسپۋبليكاسىنىڭ بۇكىل اۋماعىندا، سونداي-اق ودان تىس جەرلەردە توتەنشە جاعدايلار ايماقتارىندا اۆاريالىق-قۇتقارۋ جانە ىزدەستىرۋ-قۇتقارۋ جۇمىستارىن جۇرگىزۋ جونىندەگى مامانداندىرىلعان ۇيىم رەتىندە باستادى. جاساقتىڭ نەگىزگى ماقساتى جەتۋ قيىن اۋدانداردا، كۇردەلىلىگى جوعارى وبەكتىلەردە قۇتقارۋ جانە ىزدەستىرۋ-قۇتقارۋ جۇمىستارىن ۇيىمداستىرۋ جانە جۇرگىزۋ، دۇلەي ءزىلزالالار، اۆاريالار مەن اپاتتار سالدارىنان زارداپ شەككەندەرگە شۇعىل كومەك كورسەتۋ، جاساقتىڭ بولىمشەلەرىنىڭ رەسپۋبليكا اۋماعىندا جانە ودان تىس جەرلەردە قۇتقارۋ جۇمىستارىن شۇعىل جۇرگىزۋگە تۇراقتى دايىندىعىن قامتاماسىز ەتۋ بولىپ تابىلادى.
جاساق الماتى قالاسىندا ورنالاسقان جانە تاۋلىك بويى كەزەكشىلىك رەجيمىندە. 2012 جىلدان باستاپ رەسپۋبليكالىق جەدەل-قۇتقارۋ جاساعىنىڭ باسشىلىعىندا حالىقارالىق دارەجەدەگى قۇتقارۋشى، 1-2 توپتاعى I ساناتتى سۇڭگۋىر، سۇڭگۋىرلەردى دايارلاۋ جونىندەگى نۇسقاۋشى ۆلاديمير سوي تۇر. مامانداردىڭ ءبىلىمى جەر سىلكىنىسى، سۋ تاسقىنى، تەحنوگەندىك اپاتتار كەزىندە ىزدەستىرۋ-قۇتقارۋ جانە اۆاريالىق جۇمىستاردى ءتيىمدى جۇرگىزۋگە مۇمكىندىك بەرەدى. جاساق ءارقاشان كەز كەلگەن توتەنشە جاعدايعا، الەمنىڭ كەز كەلگەن نۇكتەسىنە شىعۋعا دايىن.
جاساقتىڭ نەگىزگى بولىمدەرى: قۇتقارۋ، سۇڭگۋىرلىك، كينولوگيالىق، مەديسينالىق-پسيحولوگيالىق، كەزەكشى-ديسپەچەرلىك، رادياسيالىق، حيميالىق جانە بيولوگيالىق قورعاۋ بولىمشەسى. جاساقتا كەڭ بەيىندى ماماندار، قۇتقارۋشى-سۇڭگۋىرلەر، كينولوگتار، شاعىن كولەمدى كەمەلەردىڭ جۇرگىزۋشىلەرى، حالىقارالىق دەڭگەيدەگى قۇتقارۋشىلار جۇمىس ىستەيدى. بارلىق قۇتقارۋشىلار-سپورتشىلار، ولاردىڭ كوپشىلىگى سپورت شەبەرى مەن سپورت شەبەرىنە ۇمىتكەرلەر، كوپشىلىگىندە الپينيستەردىڭ توسبەلگىلەرى بار.