الماتى قالاسىنىڭ اكىمى دارحان ساتىبالدى جۇمىس ساپارى بارىسىندا «Lamiya» تۇرعىن ءۇي كەشەنى مەن جانە «كوكتەم» شاعىناۋدانىنىڭ تۇرعىندارىمەن كەزدەستى، دەپ حابارلايدى aqshamnews.kz
قالا تۇرعىندارىن الاڭداتقان ينجەنەرلىك جەلىلەردىڭ جاعدايى، اۋماقتى اباتتاندىرۋ جانە جاسىل جەلەكتەردى ساقتاۋ جايى تالقىلاندى.
«Lamiya» تۇرعىن ءۇي كەشەنى تۇرعىندارىمەن كەزدەسۋ كەزىندە ەلەكتر قۋاتىمەن ۇزدىكسىز قامتۋ جانە ينجەنەرلىك جەلىلەردى قالانىڭ يەلىگىنە بەرۋ ماسەلەسى قوزعالدى. جۇزدەسۋ بارىسىندا دارحان ساتىبالدى ەنەرگەتيكا مەن سۋمەن جابدىقتاۋ باسقارمالارىنا، قالا قۇرىلىسى باقىلاۋى قىزمەتىنە ميب وكىلدەرى مەن قۇرىلىس كومپانياسىمەن بىرلەسىپ قوسىمشا ترانسفورماتورلىق قوسالقى ستانسيا مەن رەزەرۆتىك كابەل سالۋ ماسەلەسىن پىسىقتاپ، كەيىن ونى قالانىڭ مەنشىگىنە وتكىزۋدى تاپسىردى.
سونىمەن قاتار، كوممۋنالدىق ينفراقۇرىلىم جانە تۇرعىن ءۇي ينسپەكسياسى باسقارماسىنا بۇرىنعى باسقارۋشى كومپانيانىڭ قىزمەتىن قۇزىرەتى شەگىندە تەكسەرۋ مىندەتتەلدى.
«كوكتەم» شاعىناۋدانىنىڭ تۇرعىندارى بوس جاتقان جەرلەر قۇرىلىسقا بەرىلىپ كەتە مە دەپ الاڭداپ وتىر. اكىمنىڭ تاپسىرماسىمەن جەردى ءوز بەتىمەن يەمدەنۋ فاكتىلەرى بويىنشا قوسىمشا تەكسەرۋ جۇرگىزىلەدى.
دارحان ساتىبالدىنىڭ ايتۋىنشا، جاسىل ايماقتاردى ساقتاۋ مەن قوعامدىق كەڭىستىكتەر قۇرۋ – قالا ساياساتىنىڭ باستى باسىمدىقتارىنىڭ ءبىرى.
«بارلىق شەشىم باس جوسپارعا ساي، اشىق تۇردە جانە تۇرعىنداردىڭ پىكىرىن ەسكەرە وتىرىپ قابىلدانۋى قاجەت. ەگەر بەلگىلى ءبىر اۋماق جاسىل ايماققا جاتسا، وندا ول جەردە ەشقانداي قۇرىلىس سالىنبايدى، اعاش تا كەسىلمەيدى. ءبىز اعاشتاردىڭ وتالۋىنا جول بەرمەيمىز. اۋماقتى دامىتۋ مەن تابيعاتتى ساقتاۋدىڭ اراسىنان تەپە-تەڭدىك تابۋ – ءبىزدىڭ باستى ماقساتىمىز»، – دەدى قالا اكىمى.
تۇرعىنداردىڭ ءوتىنىشى باقىلاۋعا الىنىپ، بەلگىلەنگەن تارتىپپەن قارالادى. الماتى اكىمى الماتىلىقتارمەن تۇراقتى كەزدەسىپ، ولاردىڭ ۇسىنىس-پىكىرىن جەكە تىڭدايدى. ءاربىر ماسەلە ەرەكشە نازاردا جانە ءتيىستى باسقارمالارمەن بىرلەسىپ شەشىمىن تابادى.
بۇعان دەيىن «التىن سيتي» تۇرعىن ءۇي كەشەنى تۇرعىندارىنىڭ وتىنىشىمەن قالا اكىمى دارحان ساتىبالدى تۇراقتى جىلۋمەن قامتۋدى قامتاماسىز ەتۋ جونىندە كەشەندى شارالار قابىلداۋدى تاپسىرعان بولاتىن. تۇرعىندار قىس مەزگىلىندە جىلۋدىڭ ءجيى وشەتىنىن ايتىپ، ءۇيدىڭ ىسىمايتىنىنا شاعىمدانعان. تەكسەرۋ ناتيجەسىندە اۆتونومدى قازاندىقتىڭ جۇمىسى تولىقتاي رەتتەلىپ، جاڭا جابدىقتار ورناتىلدى. قازاندىقتار مەن سورعىلار اۋىستىرىلىپ، جاڭا قازاندىقتىڭ قۇرىلىسى باستالدى. تۇرعىندار سانىنىڭ ءوسۋىن ەسكەرىلىپ سالىناتىن نىسان الداعى جىلدارى بۇكىل اۋماقتى جىلۋمەن قامتاماسىز ەتەدى.