سەبەبى، ونداعى مەملەكەتتىك ارحيۆتەر 100% تولعان.
مۇنداي دەرەكتەر مادەنيەت جانە سپورت مينيسترلىگى جاريالاعان رەتتەۋشىلىك ساياساتتىڭ كونسۋلتاتيۆتىك قۇجاتىندا كەلتىرىلگەن، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇگىنگى تاڭدا رەسپۋبليكا بويىنشا ارحيۆ قويمالارى جۇكتەمەسىنىڭ ورتاشا كورسەتكىشى - 91،2%. 2022 جىلى ول 88،2% بولعان ەدى. بۇل رەتتە 13 وبلىستىڭ (الماتى، اقمولا، اقتوبە، اتىراۋ، جامبىل، بقو، قوستاناي، قىزىلوردا، ماڭعىستاۋ، پاۆلودار، سقو، تۇركىستان، اباي) مەملەكەتتىك ءارحيۆى 100%-عا تولعان. مىسالى، اقتوبە وبلىسىنىڭ مەملەكەتتىك ءارحيۆى 135% اۋزى-مۇرنىنا دەيىن تولدى. ورتا ەسەپپەن جىل سايىن مەملەكەتتىك ارحيۆتەر 350-دەن 400 مىڭعا دەيىن ءىستى ساقتاۋعا قابىلدايدى. مەملەكەتتىك ارحيۆ وقۋ زالدارى ارقىلى پايدالانۋشىلارعا 1 ملن-نان استام ءىس بەرىلەدى. ماسەلەن، 2022 جىلى مەملەكەتتىك ساقتاۋعا 354 803 قۇجات قابىلداندى. بيىل 1 توقساندا 71 139 قۇجات تاپسىرىلدى»، - دەلىنگەن ەسەپتە.
ءمالىم بولعانداي، قازاقستاندا بەلگىلەنگەن مەرزىمنەن ارتىق ۋاقىت ساقتالىپ تۇرعان 1 ملن 724 مىڭ 387 قۇجات بار.
«بولاشاقتا بۇل قۇجاتتار مەملەكەتتىك ارحيۆتە بوس الاڭداردىڭ بولماۋىنا بايلانىستى مەملەكەتتىك ساقتاۋعا قابىلدانباۋى مۇمكىن. قالىپتاسقان جاعداي ۇلتتىق ارحيۆ قورىنىڭ جانە جەكە قۇرامنىڭ ساقتالۋىنا ءقاۋىپ توندىرەدى»، - دەپ ماسەلە كوتەرىلگەن كونسۋلتاتيۆتىك قۇجاتتا.