سۋ تاسقىنىنا قاتىستى قازىرگى احۋال تۋرالى اقپارات تاراتۋ ءۇشىن ورتالىق كوممۋنيكاسيالار قىزمەتىندە رەسپۋبليكالىق اقپاراتتىق شتاب قۇرىلدى. بۇل شتاب ب ا ق وكىلدەرىن قۇزىرلى ورگانداردان تۇسكەن مالىمەتپەن تاۋلىك بويى قامتاماسىز ەتەدى، دەپ حابارلايدى almaty-akshamy.kz ق ر مەملەكەتتىك كەڭەسشىسى ەرلان ءقاريننىڭ Telegram پاراقشاسىنا سىلتەمە جاساپ.
- بۇگىننەن باستاپ توتەنشە جاعدايلار، قورعانىس، ىشكى ىستەر مينيسترلىكتەرى، كازگيدرومەت جانە باسقا دا مەكەمە وكىلدەرىنىڭ قاتىسۋىمەن قوسىمشا ونلاين بريفينگتەر ۇيىمداستىرىلادى. توتەنشە جاعداي جاريالانعان 10 ايماقتان جەرگىلىكتى شتابتارمەن ون-لاين بريفينگتەر جوسپارلانىپ وتىر. «24kz» تەلەارناسىنىڭ ەفيرلىك ۋاقىتى رەسپۋبليكالىق اقپاراتتىق شتابتىڭ جۇمىسىمەن ۇيلەستىرىلىپ، بريفينگتەردەن تىكەلەي حابار تاراتىلادى. بۇدان بولەك، تەلەارناداعى جاڭالىقتاردىڭ ەفيرگە شىعۋ جيىلىگى ارتىپ، سۋ تاسقىنىمەن كۇرەسۋ جانە ونىڭ سالدارىن جويۋ، قۇتقارۋ قىزمەتتەرىنىڭ، ۆولونتەرلىك ۇيىمداردىڭ جانە باسقا دا ازاماتتاردىڭ بىرلەسكەن جۇمىسى، زارداپ شەككەن ايماقتارعا گۋمانيتارلىق كومەك جيناپ جەتكىزۋ بارىسى تۋرالى تۇراقتى اقپارات بەرىلەتىن بولادى، - دەپ جازدى ەرلان قارين