- مەملەكەت باسشىسى قاسىم-جومارت توقايەۆتىڭ ۇندەۋى جاريالاندى.
پرەزيدەنت ورىن العان جاعدايعا بايلانىستى بىردە-بىر ادامدى مەملەكەت ەسكەرۋسىز قالدىرمايتىنىن جەتكىزدى.
“بۇگىن مەن ەلىمىزدىڭ ازاماتتارىنا ارنايى ۇندەۋىمدى جولداپ وتىرمىن. بارشاڭىزعا بەلگىلى، ءقازىر ەلىمىزدە كۇردەلى جاعداي قالىپتاسىپ وتىر. قاردىڭ كۇرت ەرۋىنە بايلانىستى ايماقتاردا سۋ تاسقىنى بولىپ جاتىر. بۇل – تابيعي اپات. مۇنداي احۋال ۇزاق جىلدان بەرى بولماعان. بۇل كولەمى جاعىنان سوڭعى 80 جىلدان بەرگى ەڭ ءىرى تابيعي اپات دەۋگە بولادى”،- دەدى پرەزيدەنت.
راسىندا مۇنداي كولەمدەگى تاسقىن سۋ باسۋ جاعدايى تالاي جىلدان كەيىن بولىپ جاتىر.
سۋ تاسقىنىنا بايلانىستى ەلىمىزدىڭ ون ايماعى - اباي، اقمولا، اقتوبە، اتىراۋ، باتىس قازاقستان، قاراعاندى، قوستاناي، پاۆلودار، سولتۇستىك قازاقستان جانە ۇلىتاۋ وبلىستارىندا توتەنشە جاعداي قالىپتاستى.
مەملەكەت باسشىسى قىتايدان كەلە سالىپ، اتقارۋشى ورگاندار جىبەرگەن ولقىلىقتاردى تۇزەۋ ءۇشىن شۇعىل جيىن وتكىزدى. رەسپۋبليكالىق شتاب قۇردى. ۇكىمەتكە ناقتى تاپسىرمالار بەردى. قانات بوزىمبايەۆتى ۇكىمەت باسشىسىنىڭ ورىنباسارى ەتىپ تاعايىندادى. سونىڭ ارقاسىندا ۇيلەستىرۋ جۇمىستارى جەدەل جۇرگىزىلدى. پرەزيدەنت دەر كەزىندە كىرىسپەگەندە بارلىق قاجەتتى شارالار قابىلدانباي قالار ەدى.
“بارلىق قۇتقارۋ جۇمىستارى مەنىڭ تىكەلەي باقىلاۋىمدا. سۋ تاسقىنىمەن كۇرەسۋگە توتەنشە جاعدايلار مينيسترلىگىنىڭ بارلىق رەسۋرسى تارتىلدى. سونداي-اق قۇتقارۋ جۇمىستارىنا ىشكى ىستەر مينيسترلىگى، ۇلتتىق ۇلان، قارۋلى كۇشتەر جانە ۇلتتىق قاۋىپسىزدىك كوميتەتىنىڭ ماماندارى بەلسەنە اتسالىسىپ جاتىر. زارداپ شەككەن ايماقتاردىڭ اكىمدىكتەرى كۇندىز-تۇنى جۇمىس ىستەۋدە. ونداعان مىڭ ۆولونتەر دە كومەكتەسىپ ءجۇر.
جاعداي وتە كۇردەلى بولسا دا، ءبىز قيىندىقتى مىندەتتى تۇردە ەڭسەرەمىز، بارلىعىن قالپىنا كەلتىرەمىز. ەڭ باستىسى – ازاماتتاردىڭ اماندىعى”،- دەدى پرەزيدەنت ءوز ۇندەۋىندە.
ازاماتتاردى الاڭداتقان باستى سۇراققا جاۋاپ بەرىلدى. قاسىم-جومارت توقايەۆ “بارشاڭىزعا قارجىلىق جانە باسقا دا كومەك بەرىلەدى. ماتەريالدىق شىعىندار تولىق وتەلەدى”،-دەدى.
ەڭ ۇلكەن ماسەلەنىڭ ءبىرى -وسى الاپات سۋ تاسقىنىنان ءتيىستى قورىتىندى شىعارۋ. شۇعىل تۇردە جىبەرىلگەن ولقىلىقتاردى تۇزەتىپ، ءتيىستى ساباق الۋ قاجەت. ەڭ الدىمەن سۋ شارۋاشىلىعى ماماندارىنىڭ تاپشىلىعىن بولدىرماۋ، بۇل ءۇشىن سالا ماماندارىن وقىتۋ جانە دايارلاۋ ماسەلەسى جەدەل شەشىلگەنى كەرەك.ۇكىمەت جانە جەرگىلىكتى اتقارۋشى ورگاندار سۋ تاسقىنىمەن كۇرەستى ءتيىمدى ۇيلەستىرىپ وتىرۋعا ءتيىس.
جاعدايدىڭ قانشالىقتى كۇردەلى ەكەنىن اپاتقا قارسى كۇرەسكە قورعانىس مينيسترلىگى قوسىمشا اسكەري كۇشتەرىنىڭ جۇمىلدىرىلۋى بايقاتسا كەرەك. پرەزيدەنت ەل-جۇرتقا كومەكتەسۋ ءۇشىن ۇكىمەتكە مەملەكەتتىك ماتەريالدىق رەزەرۆتى پايدالانۋدى تاپسىردى. وسىنىڭ ءوزى ەلدەگى تاسقىن سۋ زاردابىنىڭ كولەمى مەن مولشەرى وراسان ۇلكەن ەكەنىن اڭعارتادى.
مەملەكەت باسشىسى ەلدى ءتۇرلى تەرىس اقپاراتپەن ەلدى دۇرلىكتىرمەۋگە شاقىردى.
“بۇقارالىق اقپارات قۇرالدارىنا، بەلسەندى ازاماتتارعا جانە بلوگەرلەرگە ايتارىم، جۇرتتى دۇربەلەڭگە سالاتىن جالعان اقپاراتتاردى تاراتپاۋ قاجەت. قازىرگى ۋاقىتتا بيلىك پەن قوعامدى ۇيىستىراتىن ارەكەتتەر جاساۋ اسا ماڭىزدى. ازاماتتاردى تەك قانا رەسمي اقپارات كوزدەرىنە سۇيەنۋگە شاقىرامىن”،- دەدى.
سونداي-اق، پرەزيدەنت قۇتقارۋ ىسىنە ارالاسىپ جاتقان ازاماتتارعا،ءتارتىپ ساقشىلارىنا، ۆولونتەرلەرگە جانە اپاتپەن كۇرەسۋگە اتسالىسىپ جاتقان بارشا جۇرتقا العىس ايتتى. “وسىنداي قيىن-قىستاۋ كەزدە ءبىر جاعادان باس، ءبىر جەڭنەن قول شىعارۋ ايرىقشا ماڭىزدى. ءبىر ەل، ءبىر حالىق بولىپ جۇمىلىپ، بۇل اپاتتى ەڭسەرەمىز. بۇل ءبىزدىڭ قولىمىزدان كەلەدى”.
كەشە ءقادىر تۇنىندە بارشا حالىق تاسقىن سۋدان ەلدىڭ امان قالۋىن تىلەدى. بۇگىن پرەزيدەنت ەلدىڭ اماندىعىن قامتاماسىز ەتۋ ماسەلەسىن تياناقتى تۇردە قولعا العانىن جەتكىزدى.