رەسپۋبليكا كۇنىنە وراي وتاندىق تەلەارنالاردىڭ ەفيرىندە وليمپيادا چەمپيونى سەرىك ساپييەۆتىڭ ءومىرى تۋرالى اقان ساتايەۆتىڭ «بوكسەر» سپورتتىق دراماسى، قازىرگى قازاق اۋىلىنىڭ بەينەسىن كورسەتەتىن سەرىك اپرىموۆتىڭ «اۋىل» اۆتورلىق كينوسى، بيبليالىق سيۋجەت پەن ايگىلى الماتىلىق اپورتتار توعىسقان اسقار ۇزابايەۆتىڭ «ادام جانە الما» مەلودراماسى، سەرىكبول وتەپبەرگەنوۆتىڭ «پاتريوتتار ۋاقىتى» اتتى اۋقىمدى ەكشن-فيلمى، قازاق دالاسىنىڭ ايگىلى ايەلدەرى تۋرالى «ەۋرازيا پاتشايىمدارى» دەرەكتى ءفيلمى مەن اقش-تاعى فەستيۆالداردا جۇلدە العان «كوشە اقىنى» قىسقامەتراجدى ءفيلمىنىڭ تۇساۋكەسەرى وتەدى، دەپ حابارلايدى Almaty-akshamy.kz.
«ۇلتتىق كينونى قولداۋ مەملەكەتتىك ورتالىعىنىڭ» حابارلاۋىنشا، جالپى 23-29 قازان ارالىعىندا وتاندىق تەلەارنالار سوڭعى بىرنەشە جىلدا مەملەكەتتىڭ قولداۋىمەن تۇسىرىلگەن 15 تولىقمەتراجدى، دەرەكتى جانە قىسقامەتراجدى فيلمدەردى كورسەتەدى.
«وتاندىق كينووندىرىستى دامىتۋ جانە ۇلتتىق فيلمدەردى تانىمال ەتۋ باعىتىنداعى جۇمىستار بەلسەندى ءجۇرىپ جاتىر. فيلمدەرىمىزدىڭ قالىڭ كورەرمەنگە قولجەتىمدى بولۋى – ءبىز ءۇشىن ماڭىزدى. اسىرەسە، رەسپۋبليكا كۇنى مەرەكەسىندە بۇكىل وتباسىمەن جينالىپ، تەلەديداردان وتاندىق كينونى تاماشالاعانعا نە جەتسىن»، - دەدى ۇكقمو باسقارما ءتوراعاسى قۇرمانبەك جۇماعالي.
ايتا كەتسەك، كينوورتالىق بۇگىن مەملەكەتتىڭ قولداۋىمەن تۇسىرىلگەن فيلمدەردى ناسيحاتتاۋ تۋرالى «31 ارنامەن» مەموراندۋمعا قول قويدى. بۇعان دەيىن ىنتىماقتاستىق تۋرالى كەلىسسوزدەر Qazaqstan رترك، «حابار» اگەنتتىگى جانە «جەتىنشى ارنا» تەلەارنالارىمەن جاسالعان بولاتىن.
«باستى وتباسىلىق تەلەارنا رەتىندە ءبىز كينوورتالىقپەن سەرىكتەستىكتى ارتتىرۋعا جانە اقپاراتتىق قولداۋ كورسەتۋگە قۋانىشتىمىز. ءقازىردىڭ وزىندە ءبىز كورەرەمەندەرىمىزگە جاڭادان شىققان فيلمدەردى كورسەتۋدى ادەتكە اينالدىردىق جانە بولاشاقتا ۇلتتىق كينونى قولداۋ مەملەكەتتىك ورتالىعى تۇسىرگەن تۋىندىلارمەن قورجىنىمىزدى بايىتاتىن بولامىز. سول سەبەپتى ءبىز وتاندىق كينونى دامىتۋعا مۇددەلىمىز»، - دەپ اتاپ ءوتتى مەدياحولدينگ باس ديرەكتورى بەك كەنجەباي.
فيلمدەردىڭ كورسەتىلۋ ۋاقىتى تۋرالى اقپاراتتى تەلەارنالاردىڭ رەسمي سايتتارىنان تانىسا الاسىز.