«رەسپۋبليكا كۇنى ەلىمىزدىڭ بارلىق ازاماتتارى ءۇشىن ورتاق مەرەكە» - ساراپشىلار ۇلتتىق مەرەكەنىڭ ماڭىزى تۋرالى ايتتى، دەپ حابارلايدى almaty-akshamy.kz
رەسپۋبليكا كۇنىنىڭ قارساڭىندا الماتى قالاسى وڭىرلىك كوممۋنيكاسيالار قىزمەتىنىڭ الاڭىندا قازاقستان حالقى اسسامبلەياسى مەن ازاماتتىق قوعام وكىلدەرىنىڭ قاتىسۋىمەن باسپا ءسوز كونفەرەنسياسى ءوتتى.
ەستەرىڭىزگە سالا كەتەيىك، مەملەكەت باسشىسىنىڭ تاپسىرماسى بويىنشا 2022 جىلى «قازاقستان رەسپۋبليكاسىنداعى مەرەكەلەر تۋرالى» زاڭعا وزگەرىستەر مەن تولىقتىرۋلار ەنگىزىلدى. زاڭعا سايكەس 25 قازان - رەسپۋبليكا كۇنى ۇلتتىق مەرەكە بولىپ بەلگىلەندى.
بريفينگتە سويلەگەن سوزىندە الماتى قالاسى ازاماتتىق اليانسىنىڭ ءتوراعاسى قايىرجان ءابدىحالىقوۆ رەسپۋبليكا كۇنى مەرەكەسىنىڭ شىعۋ تاريحى تۋرالى ەسكە سالدى. 1990 جىلعى 25 قازاندا قازاق كسر جوعارعى كەڭەسىنىڭ قاۋلىسىمەن قازاق كسر مەملەكەتتىك ەگەمەندىگى تۋرالى دەكلاراسيا قابىلداندى.
«رەسپۋبليكا كۇنى - ەلىمىزدىڭ بارلىق ازاماتتارى ءۇشىن ورتاق مەرەكە. مەن ءۇشىن بۇل كۇن پاتريوتيزممەن، ۇلتتىق بىرەگەيلىكپەن بايلانىستى. وتكەن جىلدان بەرى بىزدە جاقسى ءداستۇر قالىپتاستى، ول - ۇلتتىق تۋدى كوتەرۋ. وسى ارقىلى ءبىز ۇلتتىق رامىزدەرگە دەگەن قۇرمەتىمىزدى تاعى ءبىر رەت كورسەتىپ وتىرمىز. شىنىندا دا، بۇل بارلىق ازاماتتاردى ەتنيكالىق، ۇلتتىق شىعۋ تەگىنە، ءدىني، الەۋمەتتىك جانە باسقا دا قالاۋلارىنا قاراماستان بىرىكتىرەتىن مەرەكە. تاريح پەن قازىرگى زامان تۇرعىسىنان رەسپۋبليكامىزدىڭ قانداي جەتىستىكتەرگە جەتكەنىن كورسەتەتىن جانە ايتاتىن مەرەكە. ەگەر تاريح ءبىزدىڭ ەگەمەندىككە قالاي قادام باسقانىمىزدى، تاۋەلسىزدىك ءۇشىن كۇرەسكەنىمىزدى كورسەتسە، وندا قازىرگى زامان تۇرعىسىنان بۇل قازىرگى قازاقستاننىڭ جەتىستىكتەرى، ونىڭ الەمدىك ارەنادا جانە ءبىزدىڭ وڭىردە حالىقارالىق مويىندالۋى»، - دەدى ق.ءابدىحالىقوۆ.
سونداي-اق، سپيكەر ءوز سوزىندە بولاشاق ۇرپاقتى ازاماتتىق جانە پاتريوتتىق قۇندىلىقتارعا باۋلۋ قاجەتتىگىنە نازار اۋداردى. ول بۇل باعىتتا بەلگىلى ءبىر قادامدار جاسالىپ جاتقانىن اتاپ ءوتتى.
ءوز كەزەگىندە، قوعام قايراتكەرى جانە قازاق ءتىلى ءمۇعالىمى الينا كان جاستاردىڭ ەل تاريحى مەن قازاق ءتىلىن ۇيرەنۋگە بەلسەندى قىزىعۋشىلىق تانىتاتىنىن اتاپ ءوتتى.
«بۇگىندە جاستارىمىزدىڭ ەلىمىزدىڭ تاريحىنا دەگەن قىزىعۋشىلىعى بايقالىپ ءجۇر. جاستارعا ءپاتريوتيزمنىڭ ۇلگىسىن كورسەتىپ، ءبىزدىڭ تاريحىمىز تۋرالى كوبىرەك ايتۋى كەرەك. رەسپۋبليكا كۇنىمەن قۇتتىقتاۋعا رۇقسات ەتىڭىزدەر. بۇل مەن ءۇشىن، سونداي-اق ەلىمىزدىڭ بارلىق ازاماتتارى ءۇشىن ماڭىزدى مەرەكە. ءبىزدىڭ ەلىمىز وركەندەي بەرسىن!»،- دەپ قورىتىندىلادى ول.