قازاقستان ءوز تاۋەلسىزدىگىن الىپ، رەسپۋبليكا بولىپ قۇرىلعالى بەرى، كوك تۋدى كوككە جەلبىرەتىپ، الەمدىك ارەنادا ەلىمىزدى تانىتىپ كەلە جاتقان سپورتشىلارىمىز از ەمەس. جىل سايىن ەلىمىزدىڭ تاجىريبەلى سپورتشىلارى عانا ەمەس، اعا بۋىننىڭ ارتىنان ەرگەن جاستارىمىز دا حالىقارالىق جارىستاردان جۇلدەلى كەلىپ ءجۇر. مۇنداي سپورتشىلاردى ناعىز رەسپۋبليكا ماقتانىشتارى مەن ەل سپورتىنىڭ بولاشاعى دەپ ايتا الامىز.
بيىل شىنايى شەبەرلىك كورسەتىپ، سپورتتىق مانسابىن تاعى ءبىر جۇلدەمەن تولىقتىرعان سپورتشىلاردىڭ ءبىرى – سامات ساعاتبەكوۆ بولدى. ءۇشارال قالاسىنىڭ تۋماسى مۇحيت اسىپ، دومينيكان رەسپۋبليكاسىندا وتكەن جاعاجاي سامبو كۇرەسىنەن ەرلەر اراسىنداعى الەم چەمپيوناتىندا قولا جۇلدەگە يە بولدى. جارىستا جالپى 4 بەلدەسۋ وتكىزگەن ول قولا ءۇشىن كەزدەسۋدە رۋمىن پالۋانىمەن كەزدەسىپ جەڭىسكە جەتتى. ول بۇعان دەيىن قونايەۆ قالاسىندا وتكەن جاعاجاي سامبو كۇرەسىنەن ەرلەر اراسىنداعى ىشكى بىرىنشىلىكتىڭ چەمپيونى اتانعان. ايتا كەتكەن ءجون، سامات سپورتتىڭ بۇل تۇرىمەن 10 جاسىنان باستاپ اينالىسىپ كەلەدى. بۇگىندە ول سامبو كۇرەسىنەن قازاقستان رەسپۋبليكاسىنىڭ سپورت شەبەرى. جەكە باپكەرى – داۋرەن جايناقوۆ.
جىل ىشىندەگى ماڭىزدى جەڭىستەردىڭ ءبىرىن ارۋجان امانگەلدى اكەلدى. ول دزيۋدودان دۇنيەجۇزىلىك ارنايى جازعى وليمپيادا ويىندارىنان جۇلدەلى ورالدى. گەرمانيانىڭ بەرلين قالاسىندا وتكەن ارنايى وليمپيدا ويىندارىنا 190 مەملەكەتتىڭ سپورتشىلارى قاتىسقان. 48 كەلىدە ب ا ق سىناعان 21 جاستاعى قازاق ارۋى ءوز شەبەرلىگىن كورسەتىپ، قولا جۇلدە قانجىعالادى. ارۋجاننىڭ جاتتىقتىرۋشىسى رۋستەم كارىمساگۋلوۆ سپورتپەن 1 جىل بۇرىن عانا اينالىسا باستاعان شاكىرتىنىڭ الەمدىك ارەناداعى بۇل جۇلدەسى وتە جاقسى ناتيجە ەكەنىن ايتادى.
بيىل جۇلدىزى جانعان جاس سپورتشىلاردىڭ قاتارىندا بەكتورە ورالحانوۆ تا بار. ول ليۆان ەلىنىڭ استاناسى بەيرۋت قالاسىندا وتكەن تەكۆاندودان الەم چەمپيوناتىنىڭ قولا جۇلدەگەرى اتاندى. 2006 جىلى دۇنيەگە كەلگەن جاس تەكۆاندوشى 6 جاستان باستاپ سپورتپەن اينالىسىپ كەلەدى. ونىڭ وسى جىلعى جۇلدەسىنەن بولەك، ءىرى جارىستاردا وزگە دە جەڭىستەرى بار: بالالار اراسىندا ق ر چەمپيونى، USA Open 2020 كادەتتەر اراسىندا جەڭىمپازى Fujairah Open 2022 جەڭىمپازى جانە Austrian Open 2022 كۇمىس جۇلدەگەرى. بەكتورەنىڭ بۇگىنگى باپكەرلەرى – رۋسلان شاكيروۆ جانە ناريمان شاكيروۆ
