الماتىدا رەسپۋبليكا كۇنىن تويلاۋعا ارنالعان ءىس-شارالار 20 قازان كۇنى «ALMATY PUPPET FESTIVAL» I حالىقارالىق قۋىرشاق تەاترلارى فەستيۆالىنىڭ سالتاناتتى اشىلۋىمەن باستالدى. فەستيۆال 24 قازانعا دەيىن جالعاسادى، مەملەكەتتىك قۋىرشاق تەاترىنىڭ ساحناسىندا جاس كورەرمەندەرگە قازاقستاننىڭ تۇكپىر-تۇكپىرىنەن، سونىمەن قاتار، الىس-جاقىن شەتەلدەردەن – وزبەكستان، پولشا، بولگاريا، گرۋزيا، تۇركيادان كەلگەن تەاتر ۇجىمى ونەر كورسەتەدى.
- 24 قازاندا رەسپۋبليكا كۇنىنە وراي ساعات 10:00-دە ورتالىق مادەنيەت جانە دەمالىس ساياباعىندا سكانديناۆيالىق سەرۋەندەۋ قالالىق فەستيۆالى وتەدى، وعان بەلسەندى ۇزاق ءومىر ءسۇرۋ ورتالىقتارىنان زەينەتكەر كوماندالارى قاتىسادى. فەستيۆال باعدارلاماسى بويىنشا سكانديناۆيالىق سەرۋەندەۋ بويىنشا كورسەتىلىمدەر، كونسەرتتىك باعدارلاما، شىعارماشىلىق كورمە، سونىمەن بىرگە، فەستيۆال قاتىسۋشىلارىن ديپلومدارمەن ماراپاتتاۋ ءراسىمى وتەدى.
بۇعان قوسا، 24-25 قازان كۇندەرى جىبەك جولى داڭعىلىندا، پانفيلوۆ پەن بايسەيىتوۆا كوشەلەرىنىڭ اراسىندا ساعات 10:00-دەن 18:00-گە دەيىن قولونەرشىلەر جارمەڭكەسى وتەدى. جارمەڭكەدە قازاقستان، وزبەكستان جانە قىرعىزستان شەبەرلەرى قولدان جاساعان بۇيىمدارىن ۇسىنادى.
رەسپۋبليكا كۇنى، 25 قازاندا ساعات 10:30-دا «مەدەۋ» بتسك-دا مەملەكەتتىك تۋدى كوتەرۋ جانە قازاقستان ءانۇرانىن جاپپاي ورىنداۋ سالتاناتتى ءراسىمى وتەدى. ءىس-شاراعا قالا جاستارى، قوعام قايراتكەرلەرى، الماتى قالاسى ءماسليحاتىنىڭ دەپۋتاتتارى جانە قازاقستان حالقى اسسامبلەياسىنىڭ وكىلدەرى قاتىسادى. سونىمەن قاتار، مەملەكەتتىك تۋدى كوتەرۋ جانە قازاقستان ءانۇرانىن جاپپاي ورىنداۋ قالانىڭ بارلىق اۋدانىندا وتەدى.
سپورتتىق ءىس-شارالارعا كەلسەك، 25 قازان كۇنى ساعات 10:00-دەن 18:00-گە دەيىن سپورتتىق-جاتتىعۋ كەشەنىندە شاعىن فۋتبول، ۆولەيبول جانە دزيۋدودان، سونىمەن قاتار، ءال-فارابي اتىنداعى قازۇۋ-دا ۇستەل تەننيسى جانە قازاق كۇرەسىنەن سپورتتىق فەستيۆال وتەدى. سونىمەن بىرگە، بالۋان شولاق اتىنداعى سپورت سارايىندا ساعات 15:00-دەن 18:00-گە دەيىن قازاقستاندىق ەسترادا جۇلدىزدارىنىڭ قاتىسۋىمەن قازاق كۇرەسىنەن «ونەر بارىسى» ءتۋرنيرى وتەدى.