1990 جىلى 25 قازاندا قازاق ءسسر-نىڭ مەملەكەتتىك ەگەمەندىگى تۋرالى دەكلاراسيا قابىلداندى.
پارلامەنت سەناتىنىڭ دەپۋتاتى مۇرات باقتيار ۇلى 25 قازان ەلىمىزدەگى ەڭ ۇلىق مەيرامداردىڭ ءبىرى بولۋعا ابدەن لايىقتى ەكەندىگىن ايتتى، دەپ حابارلايدى Almaty-akshamy.kz Elorda.info سايتىنا سىلتەمە جاساپ.
«1990 جىلى 25 قازان كۇنى قازاق كسر جوعارعى كەڭەسىنىڭ شەشىمىمەن قازاق ءسسر-نىڭ مەملەكەتتىك ەگەمەندىگى تۋرالى دەكلاراسيا قابىلداندى. وسىدان باستاپ ءبىزدىڭ وتانىمىز – قازاقستان ەڭسەسى بيىك، تەرەزەسى تەڭ دەربەس مەملەكەت رەتىندە الەم كارتاسىنان ويىپ ورىن الدى. وسى تۇرعىدان العاندا، 25 قازان ەلىمىزدەگى ەڭ ۇلىق مەيرامداردىڭ ءبىرى بولۋعا ابدەن لايىق.
ەلىمىزدە بۇل كۇن 2009 جىلعا دەيىن ۇلتتىق مەرەكە رەتىندە تويلانىپ كەلدى. 2009 جىلى «قازاقستان رەسپۋبليكاسىنداعى مەرەكەلەر تۋرالى» قولدانىستاعى زاڭعا وزگەرىستەر ەنگىزىلدى. وعان سايكەس، 30 تامىز – قازاقستان رەسپۋبليكاسىنىڭ كونستيتۋسياسى كۇنى ۇلتتىق مەرەكە بولىپ وزگەرتىلۋىنە بايلانىستى، 25 قازان – رەسپۋبليكا كۇنى مەملەكەتتىك مەرەكەلەر تىزىمىنەن الىنىپ تاستالدى. شىن مانىندە، ءبىزدىڭ ەلدىڭ ءوز ەگەمەندىگىن جاريالاعان باس مەيرامى بولۋى كەرەك ەدى. ال ونى 16 جەلتوقسانمەن قاباتتاستىرۋ تىم ىڭعايسىز.
1986 جىلى 16، 17، 18 جەلتوقسان كۇندەرى الماتى قالاسىندا قازاق ۇلتىنىڭ قانى توگىلدى. 2011 جىلى 16 جەلتوقساندا دا جاڭاوزەن قالاسىندا تاعى قان اقتى. ەندەشە مەملەكەت قۇرىلعان كۇندى وسىنداي تراگەدياسى بار كۇندە تويلاۋ مورالدىق تۇرعىدان دۇرىس ەمەس. سوندىقتان قازاقستان پرەزيدەنتى قاسىم-جومارت توقايەۆتىڭ ۇلتتىق مەرەكە مارتەبەسىن رەسپۋبليكا كۇنىنە قايتارۋدى ۇسىنۋى وتە ورىندى شەشىم بولدى. ءبىز 16 جەلتوقساندى تاۋەلسىزدىك مەرەكەسى دەپ تويلاعانىمىزبەن، 1990 جىلى 25 قازان كۇنى قازاق ءسسر-نىڭ مەملەكەتتىك ەگەمەندىگى تۋرالى دەكلاراسيا جاريالانعان ساتتەن باستاپ قازاقستان تورتكۇل دۇنيەگە دەربەس مەملەكەت رەتىندە تانىلعان. بۇل – تاريحي شىندىق. مىنە، بيىلدان باستاپ وسى ءبىر ۇلىق كۇن ءوز مارتەبەسىن الدى. مەرەكە قۇتتى بولسىن، وتانداستار»! – دەدى سەناتور.