قازاقستان ەكونوميكاسىنا 300 مىڭ اقش دوللارىنان استام ينۆەستيسيا سالعان شەتەلدىك بيزنەسمەندەرگە 10 جىلعا ۆيزا الۋ مۇمكىندىگىن بەرەتىن زاڭ جوباسى ازىرلەنىپ جاتىر.
بۇل تۋرالى ءماجىلىس دەپۋتاتتارىنىڭ ساۋالىنا ق ر پرەمەر-مينيسترىنىڭ ورىنباسارى – ساۋدا جانە ينتەگراسيا ءمينيسترى سەرىك ءجۇمانعاريننىڭ جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاقستان رەسپۋبليكاسى پرەزيدەنتىنىڭ 2022 جىلعى 1 قىركۇيەكتەگى جولداۋىنا سايكەس، وسى كەزەڭدە تۇرۋىنا ىقتيارحاتتى الۋ قۇقىعىمەن قازاقستان ەكونوميكاسىنا 300 مىڭ اقش دوللارىنان استام ينۆەستيسيا سالعان شەتەلدىك بيزنەسمەندەرگە 10 جىلعا ۆيزا الۋ مۇمكىندىگىن بەرۋگە باعىتتالعان زاڭ جوباسىن ازىرلەۋ بويىنشا جۇمىس جۇرگىزىلۋدە»، - دەپ اتاپ ءوتتى سەرىك جۇمانعارين جاۋابىندا.
بۇل رەتتە ،ونىڭ ايتۋىنشا، ەڭ الدىمەن، جۇمىس ىستەپ تۇرعان كاسىپورىنداردىڭ نەگىزگى كاپيتالىنا ينۆەستيسيالار، قوسىلعان قۇنى جوعارى ونىمدەردىڭ ونەركاسىپتىك ءوندىرىسىن قۇرۋ، جاڭا تەحنولوگيالار جانە قىزمەتتەر كورسەتۋ، ياعني قازاقستان ەكونوميكاسى ءۇشىن مۋلتيپليكاتيۆتى ەففەكت بەرەتىن ينۆەستيسيالار (سالىق تۇسىمدەرى تۇرىندەگى بيۋدجەتكە قوسىمشا قارجىلىق تۇسىمدەر، جاڭا جۇمىس ورىندارىن قۇرۋ جانە تاعى باسقالارى) ەسكەرىلەتىن بولادى.