پرەمەر-مينيستر ولجاس بەكتەنوۆتىڭ توراعالىعىمەن سۋ تاسقىنىنا قارسى شارالاردى ۇيلەستىرۋ جانە قارعىن سۋ سالدارىن جويۋ جونىندەگى رەسپۋبليكالىق شتابتىڭ وتىرىسى ءوتتى. بۇل تۋرالى Aqshamnews.kz سايتى حابارلايدى.
وتىرىس بارىسىندا:
- ەكولوگيا جانە تابيعي رەسۋرستار ءمينيسترى ەرلان نىسانبايەۆ وڭىرلەردەگى گيدرومەتەورولوگيالىق جاعداي تۋرالى باياندادى.
- «Tasqyn» جۇيەسىندەگى سۋ تاسقىنى مودەلدەۋ ناتيجەلەرىن سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ تانىستىردى.
- سۋ نىساندارىنىڭ قازىرگى جاعدايىن سۋ رەسۋرستارى جانە يرريگاسيا ءمينيسترى نۇرجان نۇرجىگىتوۆ باياندادى.
- توتەنشە جاعدايلار ءمينيسترى شىڭعىس ءارىنوۆ ىقتيمال سۋ تاسقىنىنا جەدەل ارەكەت ەتۋ دايىندىعى تۋرالى اقپارات بەردى.
سۋ تاسقىنى ءقاۋپى جوعارى ايماقتار شىعىس قازاقستان، قاراعاندى، اقمولا، سولتۇستىك قازاقستان، قوستاناي، اقتوبە، اباي، ۇلىتاۋ وبلىستارى دەپ بەلگىلەندى. ورتاشا ءقاۋىپ الماتى، جەتىسۋ، جامبىل، باتىس قازاقستان جانە اتىراۋ وبلىستارىندا بايقالىپ وتىر.
قازىرگى تاڭدا ەل اۋماعىنىڭ 67%-ى قار استىندا. قوستاناي، اقمولا، پاۆلودار، قاراعاندى وبلىستارىندا توڭ قالىڭدىعى 130-150 سم-گە دەيىن جەتكەن. سينوپتيكتەردىڭ بولجاۋىنشا، ناۋرىز جانە ءساۋىر ايلارىندا اۋا تەمپەراتۋراسى جوعارىلاپ، جاۋىن-شاشىن كوپ بولادى، بۇل ءوز كەزەگىندە سۋ تاسقىنى ءقاۋپىن ارتتىرۋى مۇمكىن.
وسىعان بايلانىستى اقمولا، باتىس قازاقستان، ۇلىتاۋ، قاراعاندى جانە سولتۇستىك قازاقستان وبلىستارىندا الدىن الۋ شارالارىن جەدەلدەتۋ تاپسىرىلدى.