ءبىراق ولار تۇرعىن ءۇي، كولىك جانە باسقا دا شىعىنداردى وزدەرى تولەۋى كەرەك.
رەسەيلىك TikTok كەڭسەسىنىڭ قىزمەتكەرلەرىنە رەسەيدە ءىشىنارا موبيليزاسيا جاريالانعاننان كەيىن قازاقستانعا، ارمەنياعا نەمەسە قىرعىزستانعا كوشۋ تۋرالى ۇسىنىس ايتىلدى، دەپ حابارلايدى Almaty-akshamy.kz
قازان ايىنىڭ ورتاسىنان باستاپ TikTok كومپانياسى ءوزىنىڭ رەسەيدەگى قىزمەتكەرلەرىنە تۇرۋعا رۇقسات بەرگەن كەز كەلگەن ەلدە جۇمىس ىستەۋگە مۇمكىندىك بەرگەن بولاتىن. ءبىراق بۇل ءۇشىن ولار رەسەيگە ورالىپ، ەڭبەك شارتىنا قوسىمشا كەلىسىمگە قول قويۋى كەرەك ەدى.
جىل باسىندا رەسەيدىڭ TikTok كەڭسەسىندە 200-300 ادام جۇمىس ىستەگەن. ءبىراق ەسەپتەرگە قاراعاندا ءاربىر ءۇشىنشى قىزمەتكەر باسقا ەلگە كوشىپ كەتكەن كورىنەدى. 2022 جىلدىڭ ناۋرىزىندا TikTok الەۋمەتتىك جەلىسى ۋكرايناداعى ارنايى اسكەري وپەراسياعا جانە فەيكتەر تۋرالى جاڭا زاڭنىڭ قابىلدانۋىنا بايلانىستى رەسەيدەگى قىزمەتىن توقتاتقان بولاتىن. پلاتفورما رەسەيدە جاڭا كونتەنت تاراتۋدى جانە تىكەلەي ەفيرگە شىعۋ مۇمكىندىگىن شەكتەدى.
ەستەرىڭىزگە سالساق، 26 قازان كۇنى شىعىس ەۋروپاداعى Tik Tok جاھاندىق بيزنەس شەشىمدەرىنىڭ جەتەكشىسى اناستاسيا پانينا ءوزىنىڭ Linkedln پاراقشاسىندا قازاقستاننان TikTok كومپانياسىنىڭ كەڭسەسىن اشۋدى جوسپارلاپ جاتقاندىعىن حابارلاعان بولاتىن.