مۇستافا وزتۇرىكتىڭ ەسكەرتكىشى الماتى وبلىسى، تالعار وزەنىنىڭ بويىنداعى قاراۋسىز قالعان كارەردە تۇرعانى ەلدىڭ اشۋىنا ءتيدى.
مۇستافا وزتۇرىك – تاەكۆوندودان قارا بەلبەۋ شەبەرى، تاەكۆوندو جەكپە-جەك ونەرىن العاش رەت قازاق جەرىنە اكەلۋشى، مىڭداعان شاكىرت تاربيەلەگەن ۇستاز، ۇلت جاناشىرى.
الەۋمەتتىك جەلىدە قىزۋ تالقىلانىپ جاتقان بەينەگە الەۋمەتتىك جەلى قولدانۋشىلارى ءتۇرلى پىكىر بىلدىرۋدە، دەپ حابارلايدى Almaty-akshamy.kz.
ولار ەلىمىزدىڭ سپورت سالاسى ءۇشىن بارىن سالعان ازاماتتىڭ ءارۋاعىنان ۇيات بولدى دەيدى.
وسىعان دەيىن ۆەلوسيپەدپەن تۇركيا ەلىن باعىندىرۋعا اتتانعان بەلگىلى جۋرناليست، اۋدارماشى ەرنات مەلس ۇلى مۇستافا وزتۇرىكتىڭ ەلىمىزدە جاستار اراسىندا قۇنى باسەڭدەگەنىن ايتقان ەدى.
«وسى ساپارعا شىعۋىما مەنى شابىتتاندىرعان – مۇستافا وزتۇرىك بولاتىن. مۇستافا وزتۇرىك ءبىز تاۋەلسىزدىگىمىزدى العان كەزدە، ەلگە قىزمەت ەتەمىن دەپ تۇركيادا جۇرگەن جەرىنەن ەلگە ورالدى.بريۋس ليدەن ارتىق بولماسا، كەم ەمەس سپورتشى. مۇستافا وزتۇرىكتىڭ ۇلتجاندىعىن، باتىلدىعىن، ەلىن سۇيگەنىن ءبىز بىلەمىز. ءبىراق، قازىرگى جاستار كوپ بىلە بەرمەيدى. ونداي تۇلعانى قازىرگى ۇرپاق ءبىلۋى كەرەك. ۇلتتىق يدەولوگيا دەگەن وسى. سول اعامىزدى ۇلگى تۇتامىن. سوندىقتان ساپار سوڭىن گيۋنەشلى اۋدانىنداعى مۇستافا وزتۇرىكتىڭ زيراتىنا بارىپ، قۇران باعىشتاۋمەن اياقتاۋعا نيەت ەتتىم»، - دەگەن ەدى.
ءيا، 2024 جىلى مۇستافا وزتۇرىكتىڭ تۋعانىنا 70 جىل تولادى. تاريحي تۇلعانىڭ جاڭا ەسكەرتكىشى سالىنىپ، قۇرمەت كورسەتىلگەندە، ەسكى ەسكەرتكىش وسىلاي قوقىستا قالماسا يگى دەيمىز. بۇل ەسكەرتكىشتىڭ دە قوقىستا كورىنىس تابۋى سول جاسالۋ شەبەرلىگى جۇرتشىلىقتىڭ كوڭىلىنەن شىقپاعان ەسكى نۇسقاداعى ەسكەرتكىش بولۋى مۇمكىن.