ەو-نىڭ رەسەيگە قارسى سانكسيالارى قازاقستاننىڭ ەۋروپامەن بيزنەسىنە اسەر ەتپەيدى. بەلگيا ەلدەردىڭ ساۋدا ىنتىماقتاستىعىن قولداۋ شارالارىن بەلگىلەۋگە، سونداي-اق قامتاماسىز ەتۋ ءۇشىن كومەكتەسۋگە دايىن.
بۇل تۋرالى بريۋسسەلدىڭ ساۋدا-ونەركاسىپ پالاتاسىنىڭ ءتوراعاسى وليۆە ۆيللوكس ەلىمىزدىڭ ساۋدا جانە ينتەگراسيا ۆيسە-مينيسترى قايرات تورەبايەۆپەن كەزدەسۋدەن كەيىن ءمالىم ەتتى، دەپ حابارلايدى Almaty-akshamy.kz
قازاقستاننىڭ ۇكىمەتتىك دەلەگاسياسى بەلگيانىڭ ەكسپورتتى ىنتالاندىرۋ اگەنتتىگىنىڭ باسشىلىعىمەن ءوزارا ءتيىمدى سەرىكتەستىك بويىنشا بىرلەسكەن شارالاردى تالقىلادى.
«وتكەن جىلى قازاقستان مەن ەۋروپا اراسىنداعى تاۋاراينالىم 21% ءوسىپ، 28،9 ملرد دوللاردى قۇرادى. ەۋروپا نارىعىنا جىل سايىن 200 ملن دوللارعا جەتكىزە الاتىن 53 ءتۇرلى ءونىمدى سۇرىپتاپ الدىق. بۇل – ەڭ الدىمەن قايتا وڭدەۋ، اۋىل شارۋاشىلىعى ونىمدەرى، فارماسيەۆتيكا، ماشينا جاساۋ. باستى مىندەتىمىز – دايىن ءونىمدى العا جىلجىتۋ. شيكىزات جاعىنان بارلىعى جاقسى. ءبىز ەو-عا مۇناي جەتكىزەمىز، وسى وداقتىڭ قازاقستاندىق قارا التىندى ساتىپ الۋىندا ەشقانداي كەدەرگى كورىپ تۇرعان جوقپىز. سانكسيالىق رەجيمدە قازاقستان – قاقتىعىس تاراپتارىنىڭ ءبىرى ەمەس، سوندىقتان ءبىز ايماقتىق جانە حالىقارالىق سيپاتتاعى بارلىق مىندەتتەمەنى ورىندايمىز. ءبىزدىڭ مىندەتىمىز –ساۋدانىڭ قارقىندى ءوسۋىن قامتاماسىز ەتۋ»، - دەدى ق ر ساۋدا جانە ينتەگراسيا ۆيسە-مينيسترى قايرات تورەبايەۆ.
«قازاقستانمەن ىنتىماقتاستىعىمىزدى كەڭەيتىپ جاتىرمىز. اسىرەسە، پاندەميادان كەيىنگى كەزەڭدە كوبىرەك كۇش سالۋىمىز كەرەك، ويتكەنى وسى ۋاقىتتا ساياحاتتاۋ مۇمكىندىگى شەكتەلدى»، - دەدى بريۋسسەلدىڭ ساۋدا-ونەركاسىپ پالاتاسىنىڭ ءتوراعاسى وليۆە ۆيللوكس.