ەۋرازياداعى ەڭ بيىك سانالاتىن كليۋچيەۆسكايا جانارتاۋى اتقىلاي باستادى، دەپ حابارلايدى Almaty-akshamy.kz.
بۇل تۋرالى رەسەيلىك تاسس اگەنتتىگىنە جانارتاۋلاردىڭ اتقىلاۋىن باقىلايتىن كامچاتكالىق توپتىڭ (KVERT) جەتەكشىسى، رەسەي عىلىم اكادەمياسى قيىر شىعىس ءبولىمىنىڭ ۆۋلكانولوگيا جانە سەيسمولوگيا ينستيتۋتىنىڭ عىلىمي قىزمەتكەرى ولگا گيرينا حابارلاعان، دەپ جازدى قازاقپارات.
«جانارتاۋدىڭ جاي عانا جارقىراۋى ەمەس، سترومبوليالىق تيپتەگى ەڭ جوعارى جارىلعىش اتقىلاۋ تىركەلدى. ازىرگە مۇنداي اتقىلاۋ ەشكىمگە ءقاۋىپتى ەمەس: حالىق ءۇشىن دە، اۆياسيا ءۇشىن دە»، - دەدى ولگا گيرينا.
كليۋچيەۆسكايا - كونتينەنتتەگى ەڭ بەلسەندى جانارتاۋ، ونىڭ بيىكتىگى - 4750 مەتر. جانارتاۋدىڭ سوڭعى رەت اتقىلاۋى 2020 جىلدىڭ قازان ايىندا بولدى. ەڭ جاقىن ەلدى مەكەن - ۋست-كامچاتسكيي اۋدانى، كليۋچي اۋىلى - جانارتاۋ باۋرايىندا، كراتەردەن 30 شاقىرىم قاشىقتىقتا ورنالاسقان.