ءى توقساننىڭ قورىتىندىسى بويىنشا تىكەلەي شەتەلدىك ينۆەستيسيا اعىنى 54% ۇلعايعان
قازاقستانعا وندىرىستەردى رەلوكاسيالاۋعا بارىنشا قولداۋ كورسەتىلەدى. بۇل تۋرالى ق ر پرەمەر-مينيسترى ءاليحان سمايىلوۆ قازاقستان ماشينا جاساۋشىلارىنىڭ X فورۋمىنىڭ پلەنارلىق وتىرىسىندا ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«شەتەلدىك ءوندىرىس ورىندارىنىڭ ەلىمىزگە رەلوكاسياسى قازاقستاننىڭ ماشينا جاساۋشىلارىنا قانداي مۇمكىندىك بەرەدى؟» دەگەن سۇراق قويىلدى ۇكىمەت باسشىسىنا پلەنارلىق وتىرىستا.
«قازىرگى ساياسي جاعداي ۇلتتىق ەكونوميكامىزعا جاعىمسىز سىرتقى فاكتورلار اكەلدى، دەگەنمەن، بەلگىلى ءبىر مۇمكىندىكتەر دە تۋعىزادى. ازىرگە كورشى ەلدە ءوز ءوندىرىسىن جاۋىپ، كەڭسەلەرىن قازاقستانعا اۋىستىرۋعا نيەت بىلدىرگەن 50-گە جۋىق كومپانيا بار. ءبىز ءقازىر ولارمەن ناقتى كەلىسسوزدەر جۇرگىزىپ جاتىرمىز. ولارعا ارنايى ەكونوميكالىق ايماقتاردا ورىن بەرىلەدى، ينۆەستيسيالار جونىندەگى زاڭنامادا كوزدەلگەن ارنايى ينۆەستيسيالىق كەلىسىمدەرگە قول قويىلادى، ءوندىرىس قۇرىپ، تابىس تابۋ كەزەڭىنە سالىقتىق باسىمدىقتار بەرىلەدى»، - دەپ جاۋاپ بەردى ءا. سمايىلوۆ.
ونىڭ ايتۋىنشا، سەگىز ايدىڭ قورىتىندىسى بويىنشا ءبىزدىڭ ەكونوميكامىزداعى نەگىزگى كاپيتالعا ينۆەستيسيا ناقتى ماندە 6% ءوستى.
ءى توقساننىڭ قورىتىندىسى بويىنشا تىكەلەي شەتەلدىك ينۆەستيسيا اعىنى 54% ۇلعايعان.
«شەتەلدىك وندىرىستەردى رەلواكسيالاۋ ەسەبىنەن قوسىمشا ينۆەستيسيالاردىڭ كەلۋى – ارينە، جاڭا جۇمىس ورىندارىن قۇرۋ، سالىق سالۋ بازاسىن كەڭەيتۋ عانا ەمەس، جاڭا تەحنولوگيالار مەن جاڭا ستاندارتتار، وتاندىق ماشينا جاساۋشىلاردىڭ جانە جالپى وڭدەۋ سالاسىنداعى وندىرۋشىلەردىڭ باسەكەگە قابىلەتىن ارتتىرۋ، سوندىقتان ءبىز وسىنداي وندىرىستەردى رەلوكاسيالاۋدى بارىنشا ىنتالاندىرا بەرەمىز»، - دەدى ۇكىمەت باسشىسى.
بۇعان دەيىن پرەمەر-مينيستر وتاندىق ماشينا جاساۋ سالاسىنىڭ رەسپۋبليكا ەكونوميكاسىنىڭ تۇراقتى دامۋىنا ەلەۋلى ۇلەس قوسىپ كەلە جاتقانىن ايتتى.
ماسەلەن، يندۋستريالاندىرۋ جىلدارى ماشينا جاساۋداعى ءوندىرىس كولەمى 6 ەسەگە ءوسىپ، 2،3 ترلن تەڭگەگە دەيىن كوتەرىلدى.
سالانىڭ ءوسىمى سوڭعى 3 جىلدا ورتا ەسەپپەن 20%-دى قۇراپ وتىر.