الماتىدا 1921-1962 جىلدارى سالىنعان تۇرعىن ءۇي قورى بار
سىبايلاس جەمقورلىققا قارسى قىزمەت مەگاپوليس تۇرعىندارىن تولعاندىراتىن اسا وزەكتى ماسەلەلەردى قامتيتىن سىبايلاس جەمقورلىق تاۋەكەلدەرىنىڭ كارتاسىن انىقتادى، دەپ حابارلايدى Almaty-akshamy.kz.
كارتاعا سايكەس، اسا وزەكتى باعىتتاردىڭ ءبىرى قۇرىلىس جانە تۇرعىن ءۇي، ونىڭ ىشىندە، الەۋمەتتىك تۇرعىن ءۇي ءبولۋ، قالا ماڭىن دامىتۋ، الەۋمەتتىك وبەكتىلەردىڭ تاپشىلىعى ماسەلەلەرى بولىپ تابىلادى.
تۇرعىن ۇي-كوممۋنالدىق شارۋاشىلىعىندا اپاتتى جاعدايلاردى جويۋ ماقساتىندا قالانىڭ تۇرعىن ءۇي قورىنىڭ 2021-2025 جىلدارعا ارنالعان باعدارلاماسىنا سايكەس تۇرعىن ءۇيدى رەنوۆاسيالاۋ، ياعني ەسكى تۇرعىن ءۇيدى جاڭاسىنا اۋىستىرۋ پروسەسى كوزدەلگەن.
بۇگىنگى تاڭدا الماتىنىڭ كوپتەگەن اۋداندارىندا نەگىزىنەن 2 قاباتتى قاڭقالى-قامىستى، 1921-1962 جىلدارى سالىنعان تۇرعىن ءۇي قورى بار.
سونىڭ ىشىندە تۇركسىب جانە جەتىسۋ اۋداندارىنىڭ وزىندە بۇزۋعا جاتاتىن 1 427 ءۇي قامتىلعان.
جاڭارتۋ باعدارلاماسىنا سايكەس قالا تۇرعىندارىن مەملەكەتتىك قاراجات بولمەي جاڭا جايلى تۇرعىن ۇيمەن قامتاماسىز ەتۋدە ينۆەستورلاردى تارتۋ كوزدەلگەن.
تۇرعىن ءۇي قورىن جاڭارتۋ جوباسىمەن سىبايلاس جەمقورلىققا قارسى ءىس-قيمىل اگەنتتىگىنىڭ پريەۆەنسيا قىزمەتىنىڭ باسشىسى سايان احمەتجانوۆ وڭىرگە جۇمىس ساپارى اياسىندا تانىستى.
ساپار بارىسىندا توزعان تۇرعىن ءۇي قورى، سونداي-اق بۇزىلعان ۇيلەردىڭ ورنىنا سالىنعان تۇرعىن ءۇي كەشەنى كورسەتىلدى.
وسى باعدارلامانى ىسكە اسىرۋ بويىنشا جەرگىلىكتى اتقارۋشى ورگانداردا عانا ەمەس، حالىق اراسىندا تۋىندايتىن ماسەلەلەر مەن پروبلەمالار تالقىلاندى.