ءۇي يەلەرى سۇرانىستىڭ ارتۋىنا رەسەيلىكتەردىڭ اعىلىپ كەلۋى سەبەپ دەپ وتىر
الماتىدا تۇرعىن ءۇي جالداۋ قۇنى ءبىر تۇندە 2-3 ەسەگە قىمباتتاپ كەتتى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
بۇگىن krisha.kz سايتىنا جۇكتەلگەن جارنامالارعا نازار اۋدارساق، 1 بولمەلى پاتەردىڭ ورتاشا جالداۋ قۇنى -250 مىڭ، 2 بولمەلى- 400 مىڭ، 3 بولمەلى 700 مىڭ تەڭگەنىڭ شاماسىندا. ال ەليتالىق تۇرعىن ءۇي كەشەنىندەگى باعا 1 ميلليون تەڭگەدەن جوعارى.
ماسەلەن، المالى اۋدانىنداعى باس-اياعى 49 شارشى مەتر بولاتىن مىنا پاتەردىڭ ارەندا اقىسى 450 مىڭ تەڭگە. ايتا كەتەرلىگى، بۇل - 4 قاباتتى ەسكى ۇيلەر. ءۇي يەسى سۇرانىس كوپ، سوندىقتان باعانى كوتەردىم دەپ وتىر. ال سۇرانىستىڭ ارتۋىنا رەسەيلىكتەردىڭ اعىلىپ كەلۋى سەبەپ ەكەنىن العا تارتتى.
«ءقازىر الماتى، استانا قالالارىندا پاتەرگە سۇرانىس وتە كوپ. ءوزىم پاتەردى جالعا بەرۋمەن بىرنەشە قالالاردا اينالىسامىن. ءوزىم دە جالداپ تۇرامىن. استانادا ەكى بولمەلى پاتەردى 500 مىڭ تەڭگەگە، الماتىدا وسى ءۇيدى 450 مىڭ تەڭگەگە بەرەمىن دەپ شەشتىم. جارنامانى بۇگىن سالدىم. تاڭەرتەڭگى باعالارعا قاراپ مەن دە وسىنداي باعانى قويدىم. باعانىڭ وسۋىنە، ارينە، رەسەيدەن كەلىپ جاتقاندار تۇرتكى بولدى»،- دەيدى ءۇي يەسى.
ءۇي يەسى «جەڭىلدىك جاسايسىز با» دەگەن ساۋالعا «450 مىڭ تەڭگەنىڭ ىشىنە كوممۋنالدىق تولەمدى قوسۋعا بولادى، ءبىراق باعانى تۇسىرمەيمىن» دەپ جاۋاپ بەردى.