ولاردىڭ باسىم بولىگى - گەرمانيا مەن اقش كومپانيالارى.
رەسەيدەن 40-تان استام شەتەلدىك كومپانيا قازاقستانعا قونىس اۋدارىپ جاتىر. بۇل تۋرالى ق ر سىرتقى ىستەر ءمينيسترىنىڭ ورىنباسارى الماس ايداروۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ەلوردادا وتكەن قازاقستان-گەرمان بيزنەس فورۋمى اياسىندا ب ا ق وكىلدەرىنە سۇحبات بەرگەن الماس ايداروۆتىڭ دەرەگىنشە، قازاقستان رەسەيلىك نارىقتان كەتۋگە نيەت تانىتىپ وتىرعان 20-دان استام ەلدىڭ 300 كومپانياسىنا قىزىعۋشىلىق تانىتىپ وتىر. ولاردىڭ باسىم بولىگى گەرمانيا مەن اقش كومپانيالارى ءارى نەگىزىنەن ونەركاسىپ، ساۋدا جانە اقپاراتتىق تەحنولوگيالار سالاسىندا جۇمىس ىستەيدى.
«ءبىز قىزىعۋشىلىق تانىتقان 300 كومپانيانىڭ 50ء-ى بىردەن كوشۋ جوسپارلارى جوقتىعىن، احۋالدىڭ مۇنان ارى قالاي داميتىنىن كۇتىپ وتىرعاندىقتارىن ايتتى. 44 كومپانيامەن ۋاعدالاستىق بار. ولار قازىرگى ۋاقىتتا كەڭسەلەرىن نەمەسە قىزمەتكەرلەرى نە وندىرىستەرىن بىزگە كوشىرىپ جاتىر»، - دەدى مينيستر ورىنباسارى.
ونىڭ ايتۋىنشا، ەڭ ءبىرىنشى بولىپ امەريكالىق Honeywell كورپوراسياسى كەڭسەسىن رەسەيدەن الماتىعا كوشىردى. باسقارۋ جانە اۆتوماتتاندىرۋدىڭ ەلەكتروندى جۇيەسىن شىعاراتىن كومپانيانىڭ اينالىمى بۇكىل قازاقستاننىڭ ىشكى جالپى ونىمىنەن اسىپ تۇسەدى.
«كومپانيالاردىڭ كوپشىلىگى قازاقستانعا كەلە المايدى. ويتكەنى، ەكونوميكامىزدىڭ كولەمى ولارعا جەتكىلىكسىز. ءبىراق، ولاردىڭ بارلىعى ءۇشىن ەۋرازيا نارىعىندا قالۋ قىزىقتىرىپ وتىر. ولار رەسەيدە جۇمىس ىستەي المايدى. ءبىراق، ەۋرازيالىق نارىقتا قالۋعا نيەتتى. ال ءبىز ءۇشىن ولار وندىرىستەرىن اشپاسا دا، تىم بولماعاندا، كەڭسەلەرىن اشۋى وتە ماڭىزدى»، - دەدى الماس ايداروۆ.