رەسەيدە قازاقستاندىق جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ فيليالدارى اشىلادى
ۇزاق مەرزىمدى ىنتىماقتاستىق ورناتۋ جانە ءبىلىم بەرۋ ساپاسىن قامتاماسىز ەتۋ، تەحنيكالىق باعىتتاعى كادرلاردى دايارلاۋ ماقساتىندا قازاقستان رەسپۋبليكاسىنىڭ ۇكىمەتى مەن رەسەي فەدەراسياسىنىڭ ۇكىمەتى اراسىندا رەسەيدە قازاقستاننىڭ جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ فيليالدارىن جانە قازاقستاندا رەسەيدىڭ جوعارى ءبىلىم بەرەتىن ءبىلىم بەرۋ ۇيىمدارىنىڭ فيليالدارىن قۇرۋ جانە ولاردىڭ جۇمىس ىستەۋى تۋرالى كەلىسىمگە قول قويۋ تۋرالى قاۋلى قابىلداندى، دەپ حابارلايدى Almaty-akshamy.kz Elorda.kz-كە سىلتەمە جاساپ.
كەلىسىمدە ەكى ەلدىڭ زاڭناماسىنا سايكەس تەڭ نەگىزدەگى فيليالدار قۇرىلاتىنى كوزدەلگەن.
كەلىسىمدى ىسكە اسىرۋ اياسىندا فيليالداردى اشۋ كەزىندە قوسارلانعان ليسەنزيا الۋ جۇزەگە اسىرىلادى.
وقىتۋ ءبىلىم بەرۋ باعدارلامالارى شەڭبەرىندە فيليالدار ورنالاسقان ەلدىڭ ءتىلى مەن تاريحىن مىندەتتى تۇردە مەڭگەرۋ ارقىلى ەكى ەلدىڭ مەملەكەتتىك تىلدەرىندە جۇرگىزىلۋى مۇمكىن.
فيليالداردا مەملەكەتتىك باقىلاۋ جانە اككرەديتتەۋ قازاقستان جانە رەسەي زاڭناماسىنا سايكەس ىسكە اسىرىلاتىن بولادى.