انيماسيا كومەگىمەن قازاق جاۋىنگەرلەرىن «تىرىلتكەن» مۋلتيپليكاتور تاريح پەن ونەردى ناسيحاتتاعىسى كەلەدى.
مۋلتيپليكاتور گلەب پونوماريەۆ تالعات تىلەۋجانوۆتىڭ «ءابىلقايىر» كارتيناسىن نەگىزگە الا وتىرىپ، بەينەبايان جاساعان، دەپ حابارلايدى Almaty-akshamy.kz
مۋلتيپليكاتور ءقازىر جاستاردىڭ سۋرەت كورمەلەرىنە بارا بەرمەيتىنىن ايتۋدا. ەسەسىنە ءبارى الەۋمەتتىك جەلىنى قولدانادى. سول سەبەپتى دە وسى فورمات ارقىلى ول تاريح پەن ونەردى ناسيحاتتاۋعا ۇلەس قوسۋدى كوزدەگەن.
مۋلتيپليكاتور ءۇشىن مۇنداي اۋقىمدى كارتيناعا «جان ءبىتىرۋ» وڭاي بولماعان. بۇل وتە ىجداعاتتىلىقتى قاجەت ەتەتىن جۇمىس. گلەب وندا بەينەلەنگەن ءاربىر كەيىپكەردەن باستاپ، كيىم-كەشەگى مەن ساۋىت-سايمانىنا دەيىن باسا ءمان بەرگەن. وعان قوسا، تابيعاتقا دا جان بىتىرەدى. سونىڭ ءبارىن 100 بەتكە ءبولىپ، ءارقايسىسىن قولمەن وڭدەپ شىققان. ناتيجەسىندە بايراق جەلبىرەپ، جىلقىلار كىسىنەپ، كۇن كۇركىرەپ، بۇلت جوڭكىگەن كورىنىس پايدا بولدى. ول باستى كارتينا رەتىندە تالعات تىلەۋجانوۆتىڭ «ءابىلقايىر» كارتيناسىمەن جۇمىس ىستەگەن. ۆيدەو تولىق بولۋ ءۇشىن ەسەنعالي سادىربايەۆتىڭ «دالا» سۋرەتىن دە قولداندى.
«بۇل ءبىزدىڭ تاريحىمىز ەمەس پە؟ ءوز باسىم سۋرەتتى العاش كورگەندە ونىڭ اتموسفەراسىنا تاڭعالدىم. وندا ساربازداردىڭ اڭىراقاي شايقاسىنا كىرەر الدىنداعى دايىندىعى بەينەلەنگەن. سۋرەتتە جاۋىنگەرلەردىڭ ءجۇزى قاتال، سۇستى ەتىپ سالىنعان. وسى ەموسيانى باسقالارعا جەتكىزگىم كەلدى. جالپى، ءبارى ۇيلەسىمدى بولىپ شىقتى. تۇسىنە وزگەرىس ەنگىزىپ، انيماسيا جاسادىم»، - دەيدى مۋلتيپليكاتور گلەب پونوماريەۆ.
بۇل مۋلتيپليكاتوردىڭ كارتينالارعا جان بىتىرگەن العاشقى جۇمىسى ەمەس. وسى باعىتتا جاسالعان بىرنەشە ەڭبەگى بار. ول قولى بوس ۋاقىتىندا وسىنداي ەرەكشە ۆيدەولار جاساۋمەن اينالىسادى. پونوماريەۆ تاريحي تۋىندىلاردىڭ بۇقارالىق اقپارات قۇرالدارىندا، كينودا جانە الەۋمەتتىك جەلىلەردە كوبىرەك بولعانىن قالايدى.