ماماندار youtobe جەلىسىندە قازاقستاندىق اۋديتوريا اراسىندا ەڭ كوپ قارالىم جينايتىن بەينەروليكتەر قازاق تىلىندە ەكەنىن العا تارتىپ وتىر.
Youtobe ستاتيستيكاسى بويىنشا، 13 ميلليون قازاقستاندىق ءبىر ايدا 1 ميللياردتان اسا بەينەروليك كورەدى، دەپ حابارلايدى Almaty-akshamy.kz 24.kz-كە سىلتەمە جاساپ.
«Youtobeء-تىڭ ستاتيستيكاسى بويىنشا، 13 ميلليون قازاقستاندىق ءبىر ايدا 1 ميللياردتان اسا بەينەروليك كورەدى. ولاردىڭ باسىم بولىگى - جەرگىلىكتى اۆتورلاردىڭ تۋىندىلارى. 600 ميلليون قازاقستاندىق بەينەروليكتىڭ 60%-ى - قازاق تىلىندە. شىن ايتسام، بۇل قۋانتارلىق كورسەتكىش»، - دەيدى Genesis Youtube Central Asia ديرەكتورى سامسون بەزمياتەجنىي.
كينو سالاسىندا دا ءقازاقتىلدى كونتەنتكە سۇرانىس ارتتى. ءبىراق سۇرانىسقا ۇسىنىس ساي ەمەس. مەملەكەت قارجى ءبولىپ، وتاندىق كينويندۋسترياعا بارىنشا قولداۋ كورسەتۋى ءتيىس دەيدى كوزى قاراقتى كورەرمەن. ءارى ولار بالالار ءۇشىن ۇسىنىلاتىن قازاق تىلىندەگى مۋلتفيلمدەر جوقتىڭ قاسى ەكەنىن ايتۋدا.
«قازاقشا مۋلتيكتەر از. وتە از. ساپالى مۋلتيكتەر بولسا، جاقسى بولار ەدى. ورىسشا كورەدى. نوۋتبۋك، تەلەفوننان قوسىپ بەرسەڭ دە، بىردەن ناستيا، نيكيتا دەگەندەردى كورەدى. كوپ بالالار سولاردى كورەدى»، - دەيدى كورەرمەندەر.
«وكىنىشكە قاراي، ءقازىر بالالار تەك ورىسشا نەمەسە اعىلشىنشا مۋلتفيلمدەر كورەدى. قازاقشا قوسىپ بەرسەك، قىزىق ەمەس دەيدى. سوندىقتان ءمان-ماعىناسى بار، كوڭىلىن اۋداراتىن، قىزىقتى مۋلتفيلمدەردى كوبىرەك ءتۇسىرۋ كەرەك دەپ ويلايمىن»، - دەيدى تاعى ءبىر كورەرمەن.
ال ساراپشىلار، ماسەلە قارجىدا ەمەس ەكەنىن قاداپ ايتتى. جىل سايىن وتاندىق كينو سالاسىن دامىتۋ ءۇشىن كەم دەگەندە 5-6 ملرد تەڭگە بولىنەدى ەكەن. "ءبىراق ول قاراجاتتى ماقساتتى پايدالانا وتىرىپ، قازاق تىلىندە ساپالى فيلم تۇسىرەتىن ماماندار ازىرگە جوق"، – دەيدى مادەنيەت جانە سپورت مينيسترلىگىنىڭ وكىلدەرى.
ءقازاقتىلدى كونتەنتتىڭ تاپشىلىعى وسكەلەڭ ۇرپاقتىڭ ءتىلىنىڭ تازالىعىنا اسەرىن تيگىزىپ وتىرعانى ءوز الدىنا ۇلكەن ماسەلە. قاتپاعان سانانى «قارا ەكراننىڭ» قالىپتاستىرىپ جاتقان جايى بار. شەتەلدىك مۋلتفيلمدەردى قازاقشا سويلەتكەن دۋبلياج اكتەرى ايگۇل يمانبايەۆا وسىلاي دەيدى.
«ءبىز ۇرپاق تاربيەلەيمىز دەسەك، الەمدىك دەڭگەيدەگى سۇرانىسقا يە كينو، مۋلتفيلمدەردى قازاق تىلىندە قازاق بالاسىنا ۇسىنۋ كەرەك. ەل بولامىن دەسەڭ، بەسىگىڭدى تۇزە. قانشا مۋلتفيلمدەردى دىبىستاۋعا قاتىسىپ، ىشىندە جۇرسەم دە، پرەمەرالارىن ءوزىم بارىپ كورەمىن. قانشاما اتا-انا بالالارىن ەرتىپ كەلەدى؟ قازاق ءتىلىن بىلمەيتىن قانشا بالا كەلەدى، بىلسە دە، شالا بىلەتىن كەلەدى. ال شىققان كەزدە قىزىعىپ، سول مۋلتفيلمدەگى پريكولدارىن ايتىپ، قىزىق-قىزىق وقيعالارىن ايتىپ، ويناپ كەلە جاتادى. مىنە، تاربيە وسىدان باستالادى. بالاعا كۇندە ماقال-ماتەل ايتىپ وتىراتىن زامان ەمەس»، - دەيدى دۋبلياج اكتەرى ايگۇل يمانبايەۆا.
بۇگىندە ماجىلىستە قازاق ءتىلىن دامىتۋعا باعىتتالعان زاڭ جوباسى قاراستىرىلىپ جاتىر. ونىڭ نورمالارىنا سايكەس، ساپالى ءارى قىزىقتى فيلمدەر ءقازاقتىلدى قاۋىمعا ۇسىنىلۋى ءتيىس. جاۋاپتىلار جوبا ىسكە اسىرىلسا، كوپ شارا اتقارىلادى دەپ سەندىرىپ وتىر.