رەسەيدە ۋاقىتشا تىركەۋ مەرزىمىنىڭ اياقتالۋى قۇقىق بۇزۋشىلىق بولىپ سانالادى.
رەسمي ماسكەۋ تالاپتارى بويىنشا، رەسەيدە جۇرگەن قازاقستان ازاماتتارى ەڭبەك قىزمەتىن جۇزەگە اسىرۋ ءۇشىن 2021 جىلدىڭ 30 قىركۇيەگىنە دەيىن رەسەي فەدەراسياسىندا بولۋىن زاڭداستىرۋ شارالارىن قابىلداۋى كەرەك، دەپ حابارلايدى Almaty-akshamy.kz.
«رەسەي فەدەراسياسى پرەزيدەنتىنىڭ 15.06.2021 جىلعى №364 جارلىعىنا سايكەس، رەسەيدەگى شەتەلدىكتەر، ونىڭ ىشىندە قازاقستان ازاماتتارى، ەڭبەك قىزمەتىن جۇزەگە اسىرۋ ءۇشىن 2021 جىلدىڭ 30 قىركۇيەگىنە دەيىن رەسەي فەدەراسياسىندا بولۋىن زاڭداستىرۋ شارالارىن قابىلداۋى كەرەك»، – دەلىنگەن قازاقستان رەسپۋبليكاسىنىڭ رەسەي فەدەراسياسىنداعى ەلشىلىگىنىڭ كونسۋلدىق ءبولىمىنىڭ حابارلاماسىندا.
رەسەيدە ۋاقىتشا تىركەۋ مەرزىمىنىڭ اياقتالۋى قۇقىق بۇزۋشىلىق بولىپ سانالادى. سونىمەن قاتار، زاڭدى نەگىزدەر بولعان جاعدايدا (جۇمىس، وقۋ جانە ت.ب.) قازاقستاندىقتار رەسەيدەن شىقپاي، ەلدە ۋاقىتشا بولۋ مەرزىمدەرىن ۇزارتۋ ءۇشىن ءىىم ورگاندارىنا جۇگىنۋگە قۇقىلى. مۇنداي جاعدايدا ازاماتتارعا جاۋاپكەرشىلىككە تارتۋ شارالارى قولدانىلمايدى.
رەسەيدە بولۋدى زاڭدى تۇردە ۇزارتۋدان باس تارتقان جانە ەلدەن كەتكىسى كەلمەگەن جاعدايدا، ازاماتتارعا قايتىپ كىرۋ قۇقىعىسىز رەسەيدەن كۇشتەپ شىعارۋ شاراسى قولدانىلۋى مۇمكىن.