وقيعا كوركەم گيمناستيكادان دوحادا وتكەن الەم كۋبوگى كەزەڭىندە بولعان
حالىقارالىق گيمناستيكا فەدەراسياسى قوسسىراق جارىسىنىڭ جۇلدەگەرلەرىن ماراپاتتاۋ راسىمىنە كەۋدەسىنە Z ءارپىن جابىستىرىپ كەلگەن رەسەيلىك گيمناست يۆان كۋلياكتى ءبىر جىلعا سپورتتان شەتتەتتى. بۇل تۋرالى فەدەراسيانىڭ باسپا ءسوز قىزمەتى مالىمدەدى، دەپ حابارلايدى Almaty-akshamy.kz Tengrinews.kz-كە سىلتەمە جاساپ.
فەدەراسيانىڭ تارتىپتىك كوميسسياسى 20 جاستاعى سپورتشى حالىقارالىق گيمناستيكا فەدەراسياسىنىڭ جارعىسىن، ونىڭ تارتىپتىك جانە ەتيكالىق كودەكستەرىن، سونداي-اق تەحنيكالىق رەگلامەنتتەردى بۇزدى دەگەن قورىتىندىعا كەلگەن. كۋلياك قولا جۇلدەنى جانە 500 شۆەيساريالىق فرانك كولەمىندەگى اقشالاي سىيلىقتى قايتارىپ، 2 مىڭ فرانك كولەمىندەگى سوت شىعىندارىن تولەۋى كەرەك.
وقيعا بيىل ناۋرىزدا كوركەم گيمناستيكادان دوحادا وتكەن الەم كۋبوگى كەزەڭىندە بولعان. سول كەزدە سپورتتىق گيمناستيكادان جاسوسپىرىمدەر اراسىنداعى رەسەي چەمپيونى پاراللەل قوسسىراقتان قولا جۇلدە جەڭىپ العان.
ماراپاتتاۋ راسىمىنەن تۇسىرىلگەن كادرلاردا كۋلياقتىڭ كيىمىنە Z ءارپى جابىستىرىلعانى كورسەتىلگەن. Z جانە V ارىپتەرى رەسەي اسكەرىنىڭ ۋكرايناعا باسىپ كىرۋىنىڭ سيمۆولى رەتىندە بەلگىلى. ولار كوبىنە رەسەيلىك اسكەري تەحنيكاعا جازىلادى.
"بىلەسىز بە، ول بىزبەن اقىلداسپادى. بۇل ونىڭ جەكە باستاماسى ەكەنى ءسوزسىز. ءبىزدىڭ جىگىتتەر - رەسەيدىڭ پاتريوتتارى. ول بىزگە ەشتەڭە ايتپادى"، - دەدى سپورتتىق گيمناستيكادان رەسەي قۇراماسىنىڭ اعا باپكەرى ۆالەنتينا روديونەنكو.
ۋكراينادا سوعىس باستالعاننان كەيىن كوپتەگەن حالىقارالىق ۇيىم رەسەيلىك جانە بەلورۋس سپورتشىلارىن جارىستارعا قاتىسۋدان شەتتەتكەن. كەيبىرىن، مىسالى، شاحماتشى سەرگەي كارياكين مەن ءجۇزۋشى ەۆگەنيي رىلوۆ رەسەيدىڭ ۋكرايناعا باسىپ كىرۋىن اشىق قولداعانى ءۇشىن جەكە جازاعا ۇشىراعان.