ونىڭ ۇستىنەن سوتقا دەيىنگى تەرگەۋ باستالدى
اقتوبەدە ەسىرتكى ساتتى دەگەن كۇدىكپەن پوليسيا قىزمەتكەرى قاماۋعا الىندى، دەپ حابارلايدى Almaty-akshamy.kz استانا ارناسىنا سىلتەمە جاساپ.
ونىڭ قاشان، قالاي ۇستالعانىن پوليسياداعىلار اشىپ ايتپاي وتىر. بەلگىلىسى، جىگىت قالالىق پوليسيا ءبولىمىنىڭ قىزمەتكەرى ەكەن. وعان قاتىستى قىلمىستىق كودەكستىڭ «ەسىرتكى زاتتارىن دايىنداۋ، ساقتاۋ جانە ساتۋ» جانە «قىزمەتتىك جالعاندىق جاساۋ» باپتارى بويىنشا ءىس قوزعالعان. ستارشينانىڭ بار مۇلكى تاركىلەنىپ، 12 جىلعا دەيىن باس بوستاندىعىنان ايىرىلۋى مۇمكىن.
«پوليسيا ستارشيناسى قاماۋعا الىندى. ونىڭ ۇستىنەن سوتقا دەيىنگى تەرگەۋ باستالىپ، تەرگەۋ امالدارى جۇرگىزىلۋدە. تارتىپتىك كوميسسيانىڭ شەشىمىمەن پوليسيا قىزمەتكەرى ىشكى ىستەر ورگانىنان بوساتىلدى، پوليسيا ءبولىمىنىڭ باستىعى اتقاراتىن قىزمەتىنەن بوساتىلدى. ق ر قپك 201-بابىنا سايكەس قىلمىستىق ءىستى تەرگەۋ شەڭبەرىندەگى وزگە اقپارات جاريالاۋعا جاتپايدى»، - دەدى اقتوبە وبلىستىق پد باسپا ءسوز قىزمەتىنىڭ جەتەكشىسى ەربولات سارقۇلوۆ.