پوليگوندار تالاپتارعا سايكەس كەلمەيدى
قالدىقتاردى باسقارۋ سالاسىنداعى پروبلەمالار جىلدان جىلعا شەشىلمەي كەلەدى. بۇل تۋرالى ق ر باس پروكۋرورى بەرىك اسىلوۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«مىسالى، اقمولا وبلىسىندا 617 ەلدى مەكەن بار. الايدا، بارلىق قاجەتتى رۇقسات قۇجاتتارى بار پوليگوندار تەك 24 ەلدى مەكەندە عانا بار، 249 ەلدىمەكەندە پوليگوندار سانيتارلىق جانە ەكولوگيالىق تالاپتارعا سايكەس كەلمەيدى»، - دەپ جازدى بەرىك اسىلوۆ دەپۋتاتتىق ساۋالعا بەرگەن جاۋابىندا.
ونىڭ ايتۋىنشا، ءدال وسىنداي جاعداي بارلىق وڭىردە بايقالىپ وتىر.
مىسالى، اقتوبە وبلىسىندا - 157 پوليگون، قوستاناي وبلىسىندا – 29، سولتۇستىك قازاقستان وبلىسىندا – 333 پوليگون تالاپتارعا سايكەس كەلمەيدى.
«قالدىقتاردى سۇرىپتاۋ جانە قايتا وڭدەۋ بارلىق وڭىرلەر ءۇشىن وزەكتى ماسەلە بولىپ قالۋدا. باس پروكۋراتۋرانىڭ 2021 جىلى جۇرگىزىلگەن جوسپارلى تەكسەرۋى ءتيىستى مينيسترلىكتىڭ جينالعان، تاسىلعان، كادەگە جاراتىلعان جانە قايتا وڭدەلگەن قالدىقتاردىڭ كولەمى مەن ولاردى ساقتاۋعا ارنالعان پوليگوندار مەن الاڭدار، جۇمىس ىستەيتىن سۋبەكتىلەر تۋرالى دەرەكتەردى تولىق بىلمەيتىنىن كورسەتتى. وسىعان بايلانىستى ۇكىمەتكە انىقتالعان بۇزۋشىلىقتار مەن كەمشىلىكتەردى جويۋ بويىنشا شارا قابىلداۋ ۇسىنىمى ەنگىزىلدى»، - دەپ حابارلادى باس پروكۋرور.
سونىمەن بىرگە، ەكولوگيا دەپارتامەنتتەرىنىڭ باسشىلارى مەن ەكولوگيا مينيسترلىگىنىڭ لاۋازىمدى تۇلعالارى تارتىپتىك جاۋاپكەرشىلىككە تارتىلعان.
قالدىقتاردى، قالدىقتاردى ساقتاۋعا ارنالعان پوليگوندار مەن الاڭداردى جيناۋ، تاسىمالداۋ، قايتا پايدالانۋعا دايىنداۋ، سۇرىپتاۋ، وڭدەۋ، قايتا وڭدەۋ، زالالسىزداندىرۋ جانە كادەگە جاراتۋ جۇيەسىنە قاتىسى بار تابيعات پايدالانۋشىلارعا تەكسەرۋ جۇرگىزىلەدى.
«وسى تەكسەرۋدىڭ ناتيجەسى بويىنشا بارلىق وبلىس پروكۋرورلارى اكىمدىكتەر مەن ەكولوگيا دەپارتامەنتتەرىنە قاداعالاۋ اكتىلەرىن ەنگىزدى، سونداي-اق ق ر پرەمەر-مينيسترىنىڭ ءبىرىنشى ورىنباسارىنا اپاتتى قوقىستار، پوليگونداردىڭ بولماۋى، جابىق پوليگونداردى پايدالانۋ جانە كوممۋنالدىق قالدىقتاردى باسقارۋ سالاسىنداعى باسقا دا ماسەلەلەر تۋرالى حات پەن ولاردى شەشۋ بويىنشا ۇسىنىستاردى جولدادى»، - دەدى بەرىك اسىلوۆ.