رەسەي اۋماعىنداعى مەتاللۋرگيالىق كاسىپورىندا قازاقستاننىڭ ەكى ازاماتى قازا تاپتى، دەپ حابارلايدى اqshamnews.kz ءتىلشىسى.
قايعىلى وقيعا رەسەيدىڭ ۆولوگدا وبلىسىندا ورنالاسقان چەرەپوۆەس مەتاللۋرگيالىق كومبيناتى اۋماعىندا بولعان. اتالعان كاسىپورىن – سيەۆەرستال كومپانياسىنىڭ نەگىزگى وندىرىستىك اكتيۆتەرىنىڭ ءبىرى.
كومپانيانىڭ مالىمەتىنشە، 14 قاڭتاردا كومبيناتتىڭ وندىرىستىك الاڭىنان مەردىگەر ۇيىمداردا جۇمىس ىستەگەن ەكى قىزمەتكەردىڭ ءمايىتى تابىلعان. ولار - قازاقستان ازاماتتارى.
"14 قاڭتاردا چەرمك وندىرىستىك الاڭىندا مەردىگەر ۇيىمداردىڭ ەكى قىزمەتكەرى – قازاقستان ازاماتتارى ءولى تابىلدى. قازىرگى ۋاقىتتا وقيعانىڭ سەبەپتەرى انىقتالىپ جاتىر، وقيعا ورنىندا ارنايى قىزمەتتەر جۇمىس ىستەپ جاتىر. قازا تاپقانداردىڭ جاقىندارىنا كوڭىل ايتامىز"، – دەپ حابارلادى “سيەۆەرستال” كومپانياسى.
ۆولوگدا وبلىسى بويىنشا رەسەي فەدەراسياسى تەرگەۋ كوميتەتىنىڭ دەرەگىنشە، وقيعا ورنىندا جەدەل-تەرگەۋ توبى جۇمىس ىستەپ جاتىر. قايعىلى جاعدايدىڭ ناقتى سەبەپتەرى انىقتالۋ ۇستىندە.