راحىمجان قوشقاربايەۆ. كوكىرەگىمىزدە ەرەكشە كوڭىل مەن ماقتانىش سەزىمىن ۇيالاتاتىن وسى ءبىر ەسىمدى بىلمەيتىن قازاق، وسى باتىردىڭ ەرلىگىن قايتالاۋدى ارماندامايتىن جاس ۇرپاق جوق بولار، ءسىرا. ويتكەنى، راقىمجان ەرلىگى – ەرىكسىز باس يدىرەتىن ەرەن ەرلىك.
راقىمجان قوشقاربايەۆ 1924 جىلى 19 قازاندا اقمولا وبلىسى اقمولا اۋدانىندا دۇنيەگە كەلگەن. 1942 جىلى اسكەرگە الىنىپ، 1944 جىلى فرۋنزەدەگى (بىشكەك) جاياۋ اسكەر ۋچيليششەسىن بىتىرگەن. 1944 جىلى قازان ايىنان باستاپ I بەلورۋس مايدانىنداعى 150-يدريسك اتقىشتار ديۆيزياسى قۇرامىندا ۆزۆود باسقارىپ، پولشا جانە گەرمانيا جەرلەرىندەگى ۇرىستارعا قاتىستى. لەيتەنانت قوشقاربايەۆ بەرلين وپەراسياسى كەزىندە اسقان ەرلىك كورسەتتى. 30-ساۋىردە ول جاۋىنگەر گريگوريي بۋلاتوۆ ەكەۋى كەڭەس اسكەرلەرى اراسىنان رەيحستاگقا الدىمەن جەتىپ، جەڭىس تۋىن تىكتى. سوعىستان كەيىنگى جىلدارى ەلبا بويىنداعى كەڭەستىك وككۋپاسيالىق اسكەر بولىمىندە قىزمەت اتقاردى.
ر.قوشقاربايەۆتىڭ مايدانداعى سوعىستارعا قاتىسۋى مەرزىمدى باسپاسوزدە جانە كوركەم ادەبيەتتە جان-جاقتى جازىلدى. بەرليننىڭ وزىندە بولعان سوعىستاردا ول ءوزىنىڭ ۆزۆودىمەن ەڭ الدىڭعى شەپتەردە بولدى. كورول الاڭىنا – «گيتلەردىڭ ۇيىنە» ءبىرىنشى بولىپ جەتتى. I دارەجەلى «ۇلى وتان سوعىسى» وردەنىمەن ماراپاتتالدى. ودەر وزەنىنەن وتۋدەگى قاندى شايقاستان كەيىن ونى پارتيا مۇشەلىگىنە قابىلدادى. ال پارتيا بيلەتى اسا ماڭىزدى بەكىنىستى جانە ساياسي ماڭىزدى ماقساتقا جەتۋدىڭ ماداقتاۋ بەلگىسى رەتىندە «گيتلەردىڭ ۇيىندە» تابىس ەتىلدى. وسىندا «گيتلەردىڭ ۇيىندە» بارلاۋ ۆزۆودىنىڭ كومانديرى، لەيتەنانت قوشقاربايەۆقا رەيحستاگقا قىزىل تۋدى تىگۋ تۋرالى تاريحي جاۋىنگەرلىك بۇيرىق بەرىلدى. جالاۋدى وعان باتالون كومانديرى داۆىدوۆ جانە ساياسي جەتەكشى ۆاسيلچەنكو تابىس ەتتى. «گيتلەر ءۇيى» مەن رەيحستاگكا دەيىن اراقاشىقتىق 360 مەتر عانا، ءبىراق ول جان-جاعىنان وق جاۋدىرىلعان اشىق الاڭ ۇستىندە ەدى. لەيتەنانت قوشقاربايەۆ ءوزىنىڭ جاۋىنگەرلەرىمەن بۇل قاندى مەترلەردى تولاسسىز اتىلعان وقتىڭ استىندا 7 ساعاتتا، جەرگە جابىسا ەڭبەكتەۋمەن ءوتتى. رەيحستاگقا ول گريگوريي بۋلاتوۆ دەگەن سولداتپەن بىرگە جەتتى جانە بۇيرىقتى ورىنداپ، رەيحستاگتىڭ فرونتونىنا تۋدى تىكتى. بۇل ءساۋىردىڭ 30-ى كۇنى 18 ساعات 30 مينۋتتا بولعان ەدى. تاريحي ەرلىك جايىنداعى بۇل حابار بۇكىل اسكەري بولىمدەردى شارلادى، باسپاسوزدە كەڭىنەن حابارلاندى.
ول «قىزىل تۋ»، I دارەجەلى «وتان سوعىسى» وردەندەرىمەن، كوپتەگەن مەدالدارمەن ماراپاتتالعان. حالىق قاھارمانى اتاعى ر.قوشقاربايەۆقا 2001 جىلى بەرىلدى. ءوزى 1988 جىلى 10 تامىزدا الماتى قالاسىندا دۇنيەدەن وزعان.
ازىرلەگەن اينۇر سەنبايەۆا.