الماتى قالاسى مادەنيەت باسقارماسىنىڭ باستاۋىمەن «رۋحاني جاڭعىرۋ» باعدارلاماسى اياسىندا «كيەلى جولدىڭ يەسى – رايىمبەك...» كىتابىنىڭ تۇساۋكەسەر ءراسىمى ءوتتى. اتالمىش ءىس-شاراعا قوعام قايراتكەرلەرى، جازۋشىلار وداعىنىڭ مۇشەلەرى، قازاق ونەرىنىڭ مايتالماندارى قاتىستى.
«قازاق ەلىنىڭ ازاتتىعى جولىندا كۇرەسىپ، كوزى تىرىسىندە قول باستاعان باتىر، اۋليە اتانعانعان بابامىزدىڭ ەرلىگى ماڭگىلىك ەل ەسىندە ساقتالاتىنى ءسوزسىز. ءباھادۇر بابامىز جايلى اڭىز اڭگىمەلەردى تىزبەكتەپ ايتساق، بۇگىن بىتپەسپىز. دەگەنمەن ەل قۇلاعىنا ءالى جەتە قويماعان وقيعالارىن ءبىرى بىلسە، ەندى ءبىرى بىلە قويماس. وسى وقىلىقتاردىڭ ورنىن تولتىرۋ ماقساتىندا ەرەكشە كىتاپتى 1000 دانامەن جارىققا شىعاردىق. كىتاپقا دەمەۋشىلىك بىلدىرگەن جاندارعا، جازۋشىلارىمىزعا ۇلكەن العىسىمدى بىلدىرەمىن. بۇل كىتاپ – ۇلتىمىزدىڭ ءوزىن-وزى ءتانىپ-بىلىپ باعالاۋىنىڭ يگى باستاماسى بولماق»، – دەيدى «الماتى قالاسى مۇزەيلەر بىرلەستىگىنىڭ» كمقك ديرەكتورى ءانۋار ۇمبەتالييەۆ.
كۇرەسكە تولى ومىرىندە 77 جەردەن اۋىر دەنە جاراقاتىن الىپ، اتاقتى ويرانتوبە شايقاسىندا قالماقتىڭ 17 باتىرىن ويسىراتا جەڭگەن ءباھادۇردىڭ كورىپكەلدىلىگى، اۋليەلىگى بولعان. «ەسىمى ۇران بولىپ، سۋ جول بەرگەن سايىپقىران رايىمبەك باتىر تۋرالى 1999 جىلى ەستىپ، كەيىن ول جايىندا تانىمىم كەڭەيدى. سول كەزدەرى قاتتى كۇيزەلىسكە ۇشىراپ، ءوزىمدى جايسىز سەزىنىپ، سەرگەلدەڭگە تۇسكەن ەدىم. ءبىر تانىسىمنىڭ نۇسقاۋىمەن باتىردىڭ باسىنا بارىپ قۇران باعىشتاعانىمدا، تۇسىمە تۇيە جەتەكتەگەن اۋليە ەنىپ، بولاشاعىمنىڭ جارقىن بولاتىنىن ەسكەرتتى. كەيىننەن 22 جىلدان كەيىن تاعى دا سول اتام تۇسىمە ەنىپ، باتىردىڭ باسىنا بارعان ەدىم. وسىلايشا مادەنيەت باسقارماسىمەن بىرلەسىپ، 3 جىل جارىققا شىعا قويماعان كىتاپتى 2 ايدىڭ ىشىندە باسىپ شىعاردىق»، – دەيدى "اي-پروداكشن" ج ش س جەتەكشىسى اينۇر ارالباي قىزى.
كىتاپ رايىمبەك تۇكە ۇلى تۋرالى زەرتتەۋلەر، ەسسەلەر مەن ماقالالار، ەل اۋزىندا جۇرگەن اڭىزدار ءھام جىر-داستاندار، بەلگىلى اقىنداردىڭ ارناۋ ولەڭدەرى، ءباھادۇر باباعا قاتىستى فوتوسۋرەتتەر توپتاستىرىلعان ءۇش بولىمنەن تۇرادى. ASPAN باسپاسىنان شىعارىلعان تانىمدىق باسىلىم ارناۋلى جانە جوعارى وقۋ ورىندارىنىڭ ستۋدەنتتەرىنە، مەكتەپ وقۋشىلارى مەن قالىڭ وقىرمان قاۋىمعا جول تارتپاق.
«رايىمبەكتىڭ كوركەم بەينەسى ارقىلى حالقىمىزدىڭ رۋلىق سانادان ۇلتتىق ساناعا وتكەن شەشۋشى كەزەڭدەرى سۋرەتتەلگەن. ەلىمىزدىڭ ەڭ ءىرى مەگاپوليسى، عىلىم مەن مادەنيەت وشاعى الماتى قالاسىندا باتىردىڭ كەسەنەسى بوي تۇزەپ، حالقىمىزدىڭ جاسامپاز رۋحىن اسقاقاتاتقان ەدى. ەندى وسى كىتاپ ارقىلى وتكەنىمىزدى تۇگەندەپ، كەلەشەگىمىزدى كەمەلدەيتىنىمىزگە سەنەمىن»، – دەيدى جازۋشىلار وداعى باسقارما ءتوراعاسىنىڭ ورىنباسارى باقىت بەدەلحان.
باتىر بابامىزدىڭ قايراتكەرلىگىنە ارنالعان مۇرا جاس ۇرپاقتىڭ سانا-سەزىمىن ارتتىرىپ، ۇلتتىق رۋحتى اسقاقتاتارى انىق.