اەس سالۋدى قولداۋ جونىندەگى حالىقتىق شتاب جۇمىسىن پاۆلودار وبلىسىندا جالعاستىردى، دەپ حابارلايدى aqshamnews.kz
سەنات ءتوراعاسى ماۋلەن اشىمبايەۆ باستاعان دەپۋتاتتار، ساراپشىلار جانە قوعام قايراتكەرلەرى اقسۋ جانە پاۆلودار قالالارىندا بولىپ، ەنەرگەتيكالىق كورپوراسيا ۇجىمىمەن جانە مەتاللۋرگيا سالاسىنىڭ ماماندارىمەن كەزدەستى. سونىمەن قاتار، شتاب مۇشەلەرى ساراپشىلار قاۋىمداستىعى مەن بەلسەندى جاستارمەن دە جۇزدەستى. كەزدەسۋلەر بارىسىندا اەس سالۋ ماسەلەسىنە قاتىستى الداعى رەفەرەندۋمنىڭ ماڭىزدىلىعى مەن ءمانى تالقىلاندى.
ەۋرازيالىق ەنەرگەتيكالىق كورپوراسيا جانە قازاقستان ءاليۋمينييى كومپانياسى ۇجىمدارىمەن كەزدەسۋلەردە شتاب مۇشەلەرى ەنەرگەتيكا سالاسىنداعى وزەكتى ماسەلەلەرگە، اسىرەسە ەلەكتر ەنەرگياسىنىڭ تاپشىلىعى، ەلەكتر ستانسالارىنىڭ توزۋى جانە يمپورتقا تاۋەلدىلىككە كەڭىنەن توقتالدى.
ماۋلەن اشىمبايەۆ اتاپ وتكەندەي، قازاقستان جان باسىنا شاققانداعى كومىرقىشقىل گازىن شىعارۋ بويىنشا الەمدە الدىڭعى ورىنداردىڭ ءبىرىن الادى. وسىعان بايلانىستى ەلىمىزدە كومىرتەگى قالدىقتارىن ازايتۋ ءۇشىن وندىرىستە يننوۆاسيانى كەڭىنەن ەنگىزۋ ماڭىزدى. اۋاعا كومىرقىشقىل گازىن از شىعاراتىن ەنەرگيا كوزدەرىن پايدالانۋ ارقىلى ەلدەگى ەنەرگيا تاپشىلىعىن شەشۋ ماسەلەسى وتە وزەكتى بولىپ وتىر.
«پرەزيدەنتىمىز قاسىم-جومارت توقايەۆتىڭ ماقۇلداۋىمەن 6 قازاندا ەلىمىزدە اەس سالۋ ماسەلەسىنە قاتىستى رەسپۋبليكالىق رەفەرەندۋم وتەدى. رەفەرەندۋمنىڭ ماڭىزدىلىعىن ءتۇسىندىرۋ ماقساتىندا حالىقتىق شتاب قۇرىلدى. ونىڭ قۇرامىندا دەپۋتاتتار، پارتيالار، ءتۇرلى ۇيىمدار جانە ەل بولاشاعىنا بەي-جاي قارامايتىن بەلسەندى ازاماتتار بار. قازىرگى تاڭدا ەلىمىزدەگى جۇمىس ىستەپ تۇرعان كومىر ەلەكتر ستانسالارىنىڭ توزۋ دەڭگەيى شامامەن 70 پايىزعا جەتتى. ارينە، قازاقستان تابيعي رەسۋرستارعا باي، ءبىراق ولاردىڭ كوپشىلىگى قالپىنا كەلمەيتىن رەسۋرستار ەكەنىن ۇمىتپاۋىمىز كەرەك. بۇل رەسۋرستار شەكسىز ەمەس. سوندىقتان ەلدىڭ بولاشاعىن قامتاماسىز ەتەتىن تۇراقتى جانە ءقاۋىپسىز ەنەرگيا كوزى قاجەت. وسى تۇرعىدا اتوم ەلەكتر ستانساسى ۇزاق جىلدار بويى سەنىمدى ەنەرگيامەن قامتاماسىز ەتە الاتىن الەۋەتكە يە»، – دەدى ماۋلەن اشىمبايەۆ.