رەسپۋبليكالىق رەفەرەندۋم كەزىندە «داۋىس بەرۋگە قاتىسۋ قۇقىعىم بۇزىلدى» دەپ ەسەپتەگەن ازاماتتار پروكۋرورلار مەن سوتقا جۇگىنە الادى. بۇل تۋرالى ق ر باس پروكۋرورىنىڭ اعا كومەكشىسى ازامات سارعازين ورتالىق سايلاۋ كوميسسياسىندا وتكەن سەميناردا ءمالىم ەتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
«بۇقارالىق اقپارات قۇرالدارىنداعى ۇگىت تۋرالى ايتساق، انونيمدىك ۇگىت ماتەريالدارىن تاراتۋعا، سونداي-اق رەفەرندۋمعا 1 كۇن قالعاندا جانە رەفەرەندۋم وتەتىن كۇنى ۇگىت جۇرگىزۋگە تىيىم سالىنادى. ول ءۇشىن دە اكىمشىلىك جاۋاپتىلىق قاراستىرىلعان. ياعني، اكىمشىلىك قۇقىق بۇزۋ تۋرالى كودەكستىڭ 102 جانە 113-بابىمەن جاۋاپقا تارتىلادى»، - دەدى باس پروكۋروردىڭ اعا كومەكشىسى. سونداي-اق، ول ازاماتتاردىڭ رەسپۋبليكالىق رەفەرەندۋمعا قاتىسۋ قۇقىعى شەكتەلسە نەمەسە بۇزىلسا، پروكۋرورلار ايرىقشا قۇزىرەتىنىڭ نەگىزىندە قىلمىستىق ءىس قوزعاي الاتىنىن ايتتى. «بۇل ىستەردى سوتتار قارايدى. بۇل جەردە اتاپ وتكىم كەلەتىنى، ازاماتتار مۇنداي كەدەرگىلەرگە تاپ بولسا، سوتقا تىكەلەي جۇگىنە دە الادى»، - دەدى ازامات سارعازين.