قۇرىلىس سالاسىنداعى 5 جاڭا جوبا قولعا الىنباق
الماتى وبلىسىندا قۇرىلىس ماتەريالدارىن وندىرەتىن 5 جاڭا كاسىپورىن اشىلادى، دەپ حابارلايدى Almaty-akshamy.kz BAQ.KZ-كە سىلتەمە جاساپ.
بۇگىن وبلىس اكىمى قانات بوزىمبايەۆ «تك «گازوبلوك» كومپانياسى مەن «المپلاست» ج ش س باسشىلارىمەن كەزدەسىپ، ىنتىماقتاستىق تۋرالى مەموراندۋمعا قول قويدى، دەپ حابارلايدى Almaty-akshamy.kz الماتى وبلىسى اكىمىنىڭ باسپا ءسوز قىزمەتىنە سىلتەمە جاساپ.
وبلىس اكىمى قانات بوزىمبايەۆ ءوز سوزىندە ەلىمىزدە قۇرىلىس سالاسى قارقىندى دامىپ كەلە جاتقانىن تىلگە تيەك ەتتى.
بۇگىنگى تاڭدا قۇرىلىس سەكتورى ەل ەكونوميكاسىنىڭ نەگىزگى درايۆەرى بولىپ تابىلادى. سونىڭ ىشىندە ءبىزدىڭ وبلىستا قۇرىلىستا جاڭا سەرپىن بايقالادى. قۇرىلىس ماتەريالدارىن شىعارۋعا ينۆەستيسيالىق بەلسەندىلىك ارتىپ وتىر. بۇل ءوز كەزەگىندە تۇرعىنداردىڭ الەۋمەتتىك جاعدايىن جاقسارتۋعا ءوز ىقپال تيگىزەتىن بولادى. بۇگىن ىلە اۋدانى مەن تالدىقورعان قالاسىندا جاڭا زاۋىتتار سالۋدى جوسپارلاپ وتىرعان ەكى ينۆەستورمەن ارنايى كەزدەسىپ وتىرمىز، - دەپ اتاپ ءوتتى بوزىمبايەۆ.
مەموراندۋم اياسىندا قۇرىلىس سالاسىنداعى 5 جاڭا جوبا قولعا الىنباق. ماسەلەن، «تك «گازوبلوك» كومپانياسى ىلە اۋدانىندا 3 زاۋىت، تالدىقورعاندا 1 زاۋىت سالۋعا نيەتتى. بۇل كاسىپورىندار گازوبلوكتار، سەمەنت پانەلدەردىڭ تالشىقتارىن، شىنى ماقتالارىن شىعاراتىن بولادى. جوبالار جەتى جىلعا جوسپارلانعان. شامامەن 26 ملرد. تەڭگە ينۆەستيسيا تارتىلىپ، 240 جۇمىس ورنى اشىلادى.
ءبىز شىعاراتىن قۇرىلىس ماتەريالدارى نەگىزىنەن سىرت ەلدەردەن اكەلىنەدى. قىسقاشا ايتقاندا، يمپورتقا تاۋەلدى. سوندىقتان ءبىز ىشكى نارىقتىڭ سۇرانىسىن وتاندىق ونىمدەرمەن تولىقتىرۋدى ماقسات ەتىپ وتىرمىز، - دەدى «تك «گازوبلوك» كومپانياسىنىڭ باس ديرەكتورى ماكسيم كيم جوبا جايلى قىسقاشا بايانداپ.
ال «المپلاست» ج ش س «تالدىقورعان» يندۋستريالدى ايماعىندا ديامەترى 20-1200 مم پلاستيك قۇبىرلار شىعاراتىن ءوندىرىس ورنىن اشادى. جوبا 2022-2023 جىلدارى ىسكە اسىرىلادى. تارتىلاتىن ينۆەستيسيا كولەمى – 2،6 ملرد. تەڭگە، 37 جۇمىس ورنى قۇرىلادى. جوبانىڭ جىلدىق قۋاتى - 16،8 مىڭ توننا.
بۇل جوبالار قۇرىلىس يندۋسترياسىنىڭ دامۋىنا جاڭا سەرپىن بەرىپ، ەل نارىعىنا وتاندىق قۇرىلىس ماتەريالدارىن كوپتەپ شىعارۋعا ۇلەس قوسپاق.
مەموراندۋمعا الماتى وبلىسىنىڭ اكىمى قانات بوزىمبايەۆ، «تك «گازوبلوك» كومپانياسىنىڭ باس ديرەكتورى ماكسيم كيم مەن «المپلاست» ج ش س ديرەكتورى سابىرحان قاسىموۆ قول قويدى.