ق ر پارلامەنتى سەناتورلارى الماتىداعى جوعارى وقۋ ورىندارىنىڭ ۇجىمدارىمەن كەزدەستى. كەزدەسۋدىڭ باستى ماقساتى 5 ماۋسىمدا ەلىمىزدە وتەتىن رەسپۋبليكالىق رەفەرەندۋمدى ءتۇسىندىرۋ بولدى.
بۇكىلحالىقتىق ساياسي ناۋقان بارىسىندا سەناتورلار قازاقستان ينجەنەرلىك-تەحنولوگيالىق ۋنيۆەرسيتەتىنە باردى. ولاردىڭ قاتارىندا دەپۋتاتتار باقىتجان جۇماعۇلوۆ، دينار نۇكەتايەۆا، تالعات مۇسابايەۆ، نۇرتورە ءجۇسىپ، سۇلتانبەك ماكەجانوۆ جانە رەفەرەندۋمدى قولداۋ جونىندەگى قالالىق شتاب باسشىسى راحمان الشانوۆ بار.
كەزدەسۋدى اشقان قازاقستان ينجەنەرلىك-تەحنولوگيالىق ۋنيۆەرسيتەتىنىڭ رەكتورى گۇلنار سارسەنبەكوۆا رەفەرەندۋمنىڭ تاريحي ماڭىزدىلىعىن اتاپ ءوتىپ، كونستيتۋسياعا وزگەرىستەر مەن تولىقتىرۋلار ەنگىزۋ قازاقستاننىڭ دەموكراتيالىق دامۋ جولىنىڭ جارقىن ۇلگىسى بولىپ تابىلاتىنى تۋرالى پىكىر ءبىلدىردى. ول وقىتۋشىلارمەن جانە ستۋدەنتتەرمەن كەزدەسۋگە ارنايى كەلگەن قوناقتارعا العىسىن جەتكىزدى.
«قازيتۋ ۇجىمى دەموكراتيالىق وزگەرىستەردى جانە مەملەكەت باسشىسىنىڭ رەسپۋبليكالىق رەفەرەندۋم وتكىزۋ تۋرالى باستاماسىن قولدايدى. بۇل ازاماتتاردىڭ دەموكراتيالىق پروسەستەرگە قاتىسۋى مەن جاڭا قازاقستاندى قۇرۋى ءۇشىن، اسىرەسە جاس ۇرپاق ءۇشىن ناقتى مۇمكىندىك. رەفەرەندۋمعا كەلىپ، وزگەرىستەر مەن ەلدىڭ بولاشاعى ءۇشىن داۋىس بەرۋ قاجەت»، - دەپ اتاپ ءوتتى رەكتور گۇلنار الىبەك قىزى.
ق ر پارلامەنتى سەناتىنىڭ دەپۋتاتتارى كونستيتۋسياعا ەنگىزىلەتىن وزگەرىستەر مەن تولىقتىرۋلار تۋرالى ايتىپ، وقىتۋشىلار مەن ستۋدەنتتەردىڭ سۇراقتارىنا جاۋاپ بەردى. ولار سونداي-اق ستۋدەنتتەردى ماڭىزدى ساياسي وقيعادان تىس قالماۋعا، رەفەرەندۋمعا كەلىپ، داۋىس بەرۋگە شاقىردى.
قازيتۋ-عا ساپارى بارىسىندا سەناتورلار جوو-نىڭ جەتىستىكتەرى مەن قىزمەت باعىتتارىمەن، ونىڭ تەحنيكالىق جانە زەرتحانالىق بازاسىمەن تانىستى، سونداي-اق ۇجىمعا ەلىمىزدىڭ جاڭا ەكونوميكاسى ءۇشىن جوعارى بىلىكتى ماماندار دايارلاۋ ىسىندە تابىس تىلەدى.
