رەفەرەندۋم قورىتىندىلارى ءبىر اي قۇپيا اقپارات قۇقىندا ساقتالادى

كوميسسيا كەزەكتى وتىرىس وتكىزدى

ورتالىق رەفەرەندۋم كوميسسياسىنىڭ كەزەكتى وتىرىسىندا 5 ماۋسىمدا وتەتىن رەفەرەندۋمعا دايىندىق بارىسى مەن رەسپۋبليكالىق رەفەرەندۋمنىڭ قۇجاتتارىن ساقتاۋ قاعيدالارى باياندالدى، دەپ حابارلايدى Almaty-akshamy.kz Baq.kz-كە سىلتەمە جاساپ.

«19-28 مامىر ارالىعىندا داۋىس بەرۋ كۇنىنە دايىندىقتى ۇيىمداستىرۋ ماسەلەلەرىن زەردەلەۋ ماقساتىندا مەن جانە مەنىڭ ارىپتەستەرىم ەلىمىزدىڭ 14 وڭىرىندە بولدىق. ساپار بارىسىندا ورتالىق كوميسسيا مۇشەلەرى رەفەرەندۋم ۋچاسكەلەرىنە باردى. ولاردىڭ ماتەريالدىق-تەحنيكالىق جاراقتالۋىن، مۇمكىندىگى شەكتەۋلى ادامدار ءۇشىن جاعدايدىڭ جاسالۋىن، كوميسسيالاردىڭ ءتىزىمدى جاساۋ، ازاماتتاردى اقپاراتتاندىرۋ جونىندەگى جۇمىسىن، جەرگىلىكتى دەڭگەيدە وقىتۋدىڭ ۇيىمداستىرىلۋىن باقىلادىق»، – دەدى ورتالىق رەفەرەندۋم كوميسسياسىنىڭ ءتوراعاسى نۇرلان ءابدىروۆ.

ال رەسپۋبليكالىق رەفەرەندۋم تۋرالى زاڭنىڭ قۇزىرەتتەرىنە ساي رەسپۋبليكالىق رەفەرەندۋمنىڭ قۇجاتتارىن ساقتاۋ قاعيدالارىن بەكىتۋ تۋرالى دايىندالعان قاۋلىنى ورتالىق رەفەرەندۋم كوميسسياسىنىڭ مۇشەسى اسىلبەك سماعۇلوۆ تانىستىردى.

«داۋىس بەرۋگە ارنالعان بيۋللەتەندەردى مورلەنگەن كۇيىندە، ونىڭ ىشىندە جەكەلەگەن جويىلعان بيۋللەتەندەردى سونداي-اق رەفەرەندۋمعا قاتىسۋعا قۇقىعى بار ازاماتتاردىڭ تىزىمدەرىن جانە ولارعا قۇجاتتاردى وبلىستىق، رەسپۋبليكالىق ماڭىزى بار قالالاردىڭ جانە استانانىڭ رەفەرەندۋم كوميسسيالارى ورتالىق رەفەرەندۋم كوميسسياسىنا تاپسىرادى. وندا رەفەرەندۋم قورىتىندىلارى جاريالانعاننان كەيىنگى ءبىر اي بويى قۇپيا اقپارات قۇقىندا ساقتالىپ، كەيىن جويىلادى»، – دەدى ول.