ساياسي شارا مەن كونستيتۋسياعا ەنگىزىلەتىن تۇزەتۋلەردىڭ ماڭىزدىلىعىن دەپۋتاتتار تۇسىندىرەدى.
الداعى جالپىۇلتتىق رەفەرەندۋم جانە ازاماتتار مەن مەملەكەتتىڭ قۇقىقتارىن قورعاۋ تەتىكتەرىن كۇشەيتەتىن نەگىزگى زاڭعا ەنگىزىلەتىن وزگەرىستەر ەلىمىزدىڭ بارلىق وڭىرىندە تالقىلانىپ جاتىر. وسى ماقساتتا حالىق قالاۋلىلارى تۇرعىندارمەن كەزدەسۋلەر وتكىزۋدە، دەپ حابارلايدى Almaty-akshamy.kz
"سايلاۋداعى ۇلكەن ءبىر ماسەلە. مەملەكەت باسشىسى ۇسىنعان سۋپەر پرەزيدەنتتىك جۇيەدەن پرەزيدەنتتىك پارلامەنتتىك جۇيەگە اۋىسۋ. بۇل وتە ورىندى دەپ ەسەپتەيمىن. سەبەبى پرەزيدەنت ءبىر قاتار ءوزىنىڭ وكىلەتتەرىنەن باس تارتىپ پارلامەنتكە بەرىپ وتىر. بۇل وتە قۇپتارلىق"، - دەدى ق ر پارلامەنتى سەناتىنىڭ دەپۋتاتى ابدالى نۇرالييەۆ.
جالپى، وزگەرىستەر مەن تولىقتىرۋلار اتا زاڭداعى 33 باپقا ەنگىزىلمەك. قوستاناي وبلىسىنىڭ قاداعالاۋ ورگانىندا پارلامەنت سەناتىنىڭ دەپۋتاتى ۆلاديمير ۆولكوۆ پروكۋراتۋرا قىزمەتكەرلەرىمەن كەزدەستى. سەناتوردىڭ ايتۋىنشا، ءوڭىر تۇرعىندارىن جەر، زاڭ الدىنداعى تەڭدىك پەن ادام قۇقىقتارىن قورعاۋعا قاتىستى تۇزەتۋلەر كوبىرەك قىزىقتىرادى. بۇل رەتتە كونستيتۋسياعا ەنگىزىلگەن تولىقتىرۋلار پروكۋراتۋرا ورگاندارى قىزمەتىنىڭ ءتارتىبىن ايقىندايدى. ونىڭ وكىلدەرى كونستيتۋسيالىق سوتتا ازاماتتاردىڭ مۇددەسىن قورعايتىن بولادى.
"ءقازىر ءتۇرلى قۇقىقتىق نورمالاردى كونستيتۋسيالىق كەڭەس تۇسىندىرەدى. الايدا حالىق ول ورگانعا تىكەلەي جۇگىنە المايدى. ونىڭ جۇمىسى كەلەر جىلعا دەيىن جالعاسادى. ال 2023 جىلدان باستاپ ادامداردىڭ ارىزىن قارايتىن كونستيتۋسيالىق سوت قۇرىلادى. بۇل ورگاننىڭ بولۋى – زاڭ ۇستەمدىگىنىڭ ءبىر بەلگىسى دەپ ءتۇسىنۋىمىز كەرەك"، - دەدى ق ر پارلامەنتى سەناتىنىڭ دەپۋتاتى ۆلاديمير ۆولكوۆ.