اەس سالۋدى قولداۋ جونىندەگى شتاب مۇشەلەرى «DAMU» يندۋستريالىق-لوگيستيكالىق ايماعىندا شاعىن جانە ورتا بيزنەس وكىلدەرىمەن كەزدەستى، سونداي-اق، «GREEN Land ALATAU» جىلىجايىنا باردى.
كەزدەسۋلەر بارىسىندا اتوم ەلەكتر ستانساسىنىڭ ەل ەكونوميكاسىنا قوساتىن ۇلەسى مەن ونىڭ مۋلتيپليكاتيۆتى اسەرى تۋرالى كەڭىنەن اڭگىمە ءوربىدى. اسىرەسە، اەس قۇرىلىسى مىڭداعان جاڭا جۇمىس ورىندارىن اشۋعا، ينفراقۇرىلىمدى دامىتۋعا جانە وتاندىق بيزنەستىڭ وركەندەۋىنە جاڭا سەرپىن بەرەتىنى ايتىلدى.
«اتوم ەلەكتر ستانساسىن سالۋ – ەلىمىزدىڭ بولاشاعى ءۇشىن ستراتەگيالىق ماڭىزى بار شەشىم. بۇل تەك ەنەرگەتيكالىق قاۋىپسىزدىگىمىزدى قامتاماسىز ەتىپ قانا قويماي، سونىمەن بىرگە، ەكونوميكالىق ءوسىم مەن حالىقتىڭ ءال-اۋقاتىن جاقسارتۋعا مۇمكىندىك بەرەدى. ءار ازاماتتىڭ داۋسى اسا ماڭىزدى، سوندىقتان ءبىز بۇل ماسەلەگە بايىپتى قاراۋىمىز كەرەك. رەفەرەندۋم – حالىقتىڭ پىكىرىن تىڭداپ، ونى ىسكە اسىرۋدىڭ ءتيىمدى جولى. مەن قازاقستاندىقتار اەس سالۋ باستاماسىن قولداپ، ەلدىڭ دامۋىنا ءوز ۇلەستەرىن قوسادى دەپ سەنەمىن»، – دەپ ماۋلەن اشىمبايەۆ قازاقستاندىقتاردى رەفەرەندۋمعا قاتىسىپ، بەلسەندى داۋىس بەرۋگە شاقىردى.
سونىمەن قاتار، كەزدەسۋ بارىسىندا اەس سالۋ ارقىلى ەلىمىزدىڭ ەنەرگەتيكالىق تاۋەلسىزدىگى مەن تۇراقتىلىعىنا قالاي قول جەتكىزۋگە بولاتىنى، ونىڭ قورشاعان ورتاعا اسەرى جانە ۇزاق مەرزىمدى تيىمدىلىگى دە تالقىلاندى. شتاب مۇشەلەرى اتوم ەنەرگەتيكاسىنىڭ قازاقستاندى الداعى جىلدارداعى نەگىزگى ەنەرگيا كوزىنە اينالدىرىپ، ەكولوگيالىق تۇراقتىلىققا جول اشاتىنىن اتاپ ءوتتى.