پارلامەنت سەناتىنىڭ ءتوراعاسى ماۋلەن اشىمبايەۆ باستاعان اتوم ەلەكتر ستانساسىن سالۋدى قولداۋ جونىندەگى حالىقتىق شتابتىڭ مۇشەلە ش.شوكين اتىنداعى قاپشاعاي گەس-ىنىڭ قىزمەتىمەن تانىسىپ، ستانسا ماماندارى مەن باسشىلىعىمەن كەزدەستى.
كەزدەسۋ بارىسىندا ەلدىڭ ەنەرگەتيكالىق سەكتورىن دامىتۋ، وتاندىق كاسىپورىنداردى تۇراقتى ەنەرگيامەن قامتاماسىز ەتۋ جانە ەنەرگەتيكالىق تاۋەلسىزدىكتى نىعايتۋ ماسەلەلەرى جان-جاقتى تالقىلاندى.
«بۇگىنگى تاڭدا ەلىمىزدەگى ەلەكتر ەنەرگياسىنىڭ كوپشىلىگى كومىر ەلەكتر ستانسيالارىنان الىنادى. الايدا بۇل مودەل ۇزاق مەرزىمدى ەنەرگەتيكالىق تۇراقتىلىقتى قامتاماسىز ەتە المايدى. بىزگە سەنىمدى ءارى ءقاۋىپسىز ەنەرگيا كوزى قاجەت. اتوم ەنەرگەتيكاسى وسى ماسەلەنى شەشۋدىڭ ەڭ ءتيىمدى جولى بولىپ تابىلادى. ونىڭ ارتىقشىلىعى — ەكولوگيالىق تازا ءارى بىرنەشە ونجىلدىق بويى قازاقستاندى تۇراقتى ەنەرگيامەن قامتاماسىز ەتۋ مۇمكىندىگىنە يە. سونىمەن قاتار، ءوزىمىزدىڭ اتوم ەلەكتر ستانساسىن سالۋ ارقىلى كورشى ەلدەردەن ەلەكتر ەنەرگياسىن يمپورتتاۋ قاجەتتىلىگى ەداۋىر ازايادى. بۇل ەلىمىزدىڭ ەنەرگەتيكالىق تاۋەلسىزدىگىنە قول جەتكىزۋدە اسا ماڭىزدى ءارى وزەكتى قادام بولماق»، – دەدى ماۋلەن اشىمبايەۆ.
تالقىلاۋ بارىسىندا اتوم ەنەرگەتيكاسىنىڭ بولاشاعى، ونىڭ ەكولوگيالىق اسەرى جانە ەلىمىزدىڭ ەنەرگەتيكالىق جۇيەسىنە قوسار ۇلەسى كەڭىنەن ءسوز بولدى.