وسىنداي تاقىرىپپەن پارتيانىڭ شتاب مۇشەلەرى، قازاقستان رەسپۋبليكاسى پارلامەنتى ءماجىلىسىنىڭ دەپۋتاتى، اگرارلىق ماسەلەلەر جونىندەگى كوميتەتىنىڭ مۇشەسى بەكقالي تورعايەۆ، الماتى قالاسى بويىنشا AMANAT پارتياسىنىڭ اتقارۋشى حاتشىسى مەيرجان وتىنشييەۆ، الماتى قالاسى ءماسليحاتىنىڭ دەپۋتاتى بولات سادىقوۆ قازۇازۋ-دىڭ رەكتورى تىلەكتەس ەسپولوۆ، وقىتۋشىلار قۇرامى مەن ستۋدەنتتەرىمەن كەزدەسۋ وتكىزىپ، رەفەرەندۋمعا قاتىستى ءوز ويلارىن ورتاعا سالدى، دەپ حابارلايدى Almaty-akshamy.kz.
ءوز سوزىندە رەسپۋبليكالىق شتاب مۇشەسى، دەپۋتات ب.تورعايەۆ ەل پرەزيدەنتى قاسىم-جومارت كەمەل ۇلى توقايەۆتىڭ كونستيتۋسياعا وزگەرىستەر مەن تولىقتىرۋلار ەنگىزۋ تۋرالى رەسپۋبليكالىق رەفەرەندۋم وتكiءزۋدىڭ ءمان-ماڭىزىن جانە ازاماتتىق قوعامدى دامىتۋ، حالىقتىڭ مەملەكەتتىك باسقارۋعا قاتىسۋ بەلسەندىلىگىن ىنتالاندىرۋ ماسەلەسى كۇن تارتىبىنە قويىلعانىن كەڭىرەك بايانداپ ءوتتى.
«رەفەرەندۋم اتا زاڭنىڭ 33 بابىنا 56 وزگەرىس ەنگىزۋدى كوزدەيدى. كونستيتۋسيا رەفورماسى مەملەكەتتىڭ بارلىق مودەلىن كەشەندى تۇردە ترانسفورماسيالاۋعا باعىتتالعان. وزگەرىستەر سۋپەرپرەزيدەنتتىك باسقارۋ فورماسىنان ىقپالدى پارلامەنت پەن جاۋاپتى ۇكىمەتى بار پرەزيدەنتتىك رەسپۋبليكاعا ءوتۋدى قامتاماسىز ەتپەك. سونىمەن قاتار، ادام قۇقىقتارىن قورعاۋدى كۇشەيتۋ ماقساتىندا «كونستيتۋسيالىق سوت» جانە «ادام قۇقىقتارى بويىنشا ۋاكىلەتتى ورگان» دەگەن ەكى جاڭا باپ ەنگىزىلمەك. ودان كەيىن سايلاۋ جۇيەسى وزگەرەيىن دەپ وتىر. ەندى كەز كەلگەن قازاقستاندىق ازامات ءوزىن دەپۋتاتتىققا ۇسىنۋعا مۇمكىندىك الاتىن بولادى»، - دەدى بەكقالي تورعايەۆ.
ودان ارى ول پرەزيدەنتتىڭ وبلىستار مەن قالا، اۋدان اكىمدەرىنىڭ شەشىمىن ءوز قالاۋىنشا توقتاتا المايتىنىن، ەندى بۇل قۇقىق شەكتەلىپ، جەرگىلىكتى ءماسليحاتتاردىڭ جاۋاپكەرشىلىگىن ارتتىرۋ العا شىعاتىنىنا توقتالدى. جاڭاشىلدىقتىڭ تاعى ءبىرى جەر ماسەلەسىنە قاتىستى وزگەرىس. قازىرگى زاڭ بويىنشا جەر مەملەكەت مەنشىگى بولىپ سانالادى. ەندى جەر، سۋ كوزدەرى مەن باسقا دا تابيعي رەسۋرستار حالىققا تيەسىلى بولماق. مەنشىك قۇقىعىن حالىق اتىنان مەملەكەت جۇزەگە اسىرادى. وسىعان بايلانىستى حالىق ءوز شەشىمىن قابىلداۋعا ءتيىس ەكەندىگىن دە اتاپ ءوتتى.
«جالپى، الداعى اتا زاڭدا بارلىق ادامنىڭ مۇددەسى ەسكەرىلگەنىن كورىپ وتىرمىز. بىزدەر وسى بەرىلگەن مۇمكىندىكتى تولىق پايدالانىپ، ۇسىنىلعان وزگەرىستەردى قولداۋعا ءتيىسپىز دەپ ويلايمىن. رەفەرەندۋمعا قاتىسۋ – ەرتەڭىن ويلار ەلدىڭ ورتاق ءىسى. سوندىقتان، ۇستازدار مەن ستۋدەنت شاكىرتتەردى جاڭا قازاقستانعا قادام باستايتىن يگىلىكتى جولداعى جارقىن تاڭداۋدى بىرگە جاساۋعا شاقىرامىن»، - دەدى ءسوزىنىڭ سوڭىندا دەپۋتات ب.تورعايەۆ.
ەلىمىزدەگى دەموكراتيالاندىرۋ ۇدەرىسىن ودان ارى جالعاستىرۋدى كوزدەيتىن كونستيتۋسيالىق وزگەرىستەر مەن تولىقتىرۋلار ەنگىزۋ تۋرالى كەزدەسۋگە قاتىسۋشىلار تاراپىنان قويىلعان ءتۇرلى سۇراقتارعا دا تولىق جاۋاپ قايتارىلدى.
ءوز كەزەگىندە ۇستازدار مەن ستۋدەنتتەر الداعى 5 ماۋسىمدا وتەتىن رەفەرەندۋمعا ۇيىمشىلدىقپەن قاتىساتىندارىن ءارى ەل بولاشاعى ءۇشىن جاسالىنباق قادامداردى تولىق قولدايتىندىقتارىن جەتكىزدى.
«قاسىم-جومارت توقايەۆ باستاماشى بولعان كونستيتۋسيالىق رەفورمالاردىڭ ايرىقشا ماڭىزدى تۇسى بيلىك پەن پرەزيدەنتتىڭ قانداي دا ءبىر ساياسي پايدانى كوزدەمەيتىنى دەپ ساناۋعا بولادى. بۇل رەفورمالار مەملەكەت باسشىسى سوڭعى جىلدارى ۇسىنعان ساياسي باستامالاردىڭ قيسىندى جالعاسى بولماق. بارشاڭىزدى سايلاۋ ۋچاسكەسىنە كەلىپ، رەفەرەندۋمعا قاتىسۋعا شاقىرامىن!» - دەپ تۇيىندەدى م.وتىنشييەۆ.
AMANAT پارتياسىنىڭ رەسپۋبليكالىق جانە قالالىق شتاب مۇشەلەرى كەزدەسۋ اياسىندا ۋنيۆەرسيتەتتىڭ عىلىمي-يننوۆاسيالىق ينفراقۇرىلىمىمەن تانىسىپ، ۆاگەنينگەن ۋنيۆەرسيتەتىمەن جۇمىس ىستەۋ ينستيتۋتىندا، ميكروكلونالدى كوبەيۋ زەرتحاناسىندا بولىپ، جوو بازاسىندا اتقارىلىپ جاتقان يننوۆاسيالىق جەتىستىكتەرگە ريزاشىلىقتارىن ءبىلدىردى.