5 ماۋسىمدا ەلىمىزدە اسا ماڭىزدى ساياسي شارا - رەفەرەندۋم وتەدى.
وسىعان وراي ءبىز مەملەكەتتىك رەسپۋبليكالىق اكادەميالىق كورەي تەاترىنىڭ ديرەكتورى ەلەنا كيممەن از-كەم سۇحبات قۇرعان ەدىك.
- ەلەنا ۆيكتور قىزى، بيىل اكادەميالىق كورەي تەاترىنا 90 جىل تولادى. مەرەيتويلارىڭىز قۇتى بولسىن!
- راحمەت. شىنىندا دا، بيىل مەملەكەتتىك رەسپۋبليكالىق اكادەميالىق كورەي تەاترىنا 90 جىل تولادى. بۇل - ءبىزدىڭ تەاتر ءۇشىن عانا ەمەس، جالپىقازاقستاندىق مادەنيەت ءۇشىن دە اسا ماڭىزدى وقيعا.
- مەملەكەت تاراپىنان، ءتيىستى مەكەمەلەردەن تەاترعا قانداي قولداۋلار كورسەتىلىپ جاتىر؟
- ءبىزدىڭ تەاتر - بىرەگەي ونەر ورداسى. بۇل - كورەيادان تىس جەردە ورنالاسقان الەمدەگى جالعىز مەملەكەتتىك تەاتر. بۇل - مەملەكەتىمىزدىڭ كورەي حالقىنا كورسەتىپ وتىرعان زور قۇرمەتى. سپورت جانە مادەنيەت مينيسترلىگى شىعارماشىلىق دامۋ مەن وركەندەۋ ءۇشىن بارلىق جاعدايىمىزدى جاساپ، جاڭا مۇمكىندىكتەرگە جول اشۋدا. ءبىزدىڭ ونەر ورداسىنا مەملەكەت پەن مينيسترلىك ءارقاشاندا ۇلكەن قولداۋ كورسەتىپ كەلەدى. جاقىندا پرەزيدەنت جارلىعىمەن تەاترىمىزدىڭ مايتالمانى، تانىمال تۇلعا ولەگ سافرونوۆيچ لي «بارىس» وردەنىمەن ماراپاتتالدى. بۇل بىزگە جانە ءبىزدىڭ تەاترعا كورسەتىلگەن ۇلكەن قۇرمەت دەپ ويلايمىن.
- 5 ماۋسىم كۇنى ەلىمىزدە ۇلكەن ساياسي وقيعا ورىن الماق. جالپى، رەفەرەندۋم تۋرالى قانداي پىكىردەسىز؟
- 5 ماۋسىمدا ەلىمىزدە كونستيتۋسياعا تۇزەتۋلەر مەن وزگەرىستەر ەنگىزۋ بويىنشا رەفەرەندۋم وتپەك. بۇل - ءبىزدىڭ مەملەكەتىمىز ءۇشىن وتە جاۋاپتى جانە ماڭىزدى شارا. رەفەرەندۋم - بۇل حالىق بيلىگىنىڭ ايقىن كورىنىسى، ەلدىڭ ءاربىر ازاماتىنىڭ ءوزىنىڭ ازاماتتىق ۇستانىمىن بىلدىرە وتىرىپ، «جاڭا قازاقستاندى» قۇرۋعا تىكەلەي ۇلەس قوسا الاتىندىعىنىڭ كورىنىسى. مەملەكەت باسشىسىنىڭ جاڭا قازاقستاندى قۇرۋ جانە رەفەرەندۋم وتكىزۋ تۋرالى يدەياسى - تاريحي وقيعا. ويتكەنى بۇل - ءبىزدىڭ تاريحىمىزداعى 27 جىلدان كەيىن وتكىزىلەتىن ەكىنشى رەفەرەندۋم. رەفەرەندۋمنىڭ تاريحي ماڭىزى تۇتاستاي العاندا مەملەكەتتىڭ تاعدىرىنا قاتىستى ماسەلەلەردى حالىقتىڭ تالقىلاۋىنا شىعارۋ، دەموكراتيانىڭ نەگىزدەرىن بەكىتۋ، بولاشاققا دامۋعا جاڭا ساياسي جول سالۋ بولماق.
«الداعى رەفەرەندۋم ءاربىر ازاماتتىڭ قازاقستاننىڭ بولاشاعىن ايقىندايتىن تاريحي وقيعاعا تىكەلەي قاتىسۋىنا مۇمكىندىك بەرەدى»، - دەدى پرەزيدەنت.
ءبىز، شىعارماشىلىق ادامدارى، مەملەكەت باسشىسىنىڭ جۇرگىزىپ وتىرعان زايىرلى ساياساتىن ءاردايىم قولدايمىز. ەل تاريحىندا ورىن الاتىن وسىنداي ماڭىزدى وقيعاعا مەملەكەتتىك رەسپۋبليكالىق اكادەميالىق كورەي تەاترى بەلسەندى قاتىسادى. ويتكەنى بۇل - ءبىزدىڭ بولاشاعىمىز، ءبىزدىڭ مەملەكەتىمىز!
- سۇحباتىڭىز ءۇشىن راحمەت! مەرەيتويلارىڭىز قۇتتى بولسىن!