ەندى سپورتپەن شۇعىلداناتىن وقۋشىلار دەنە شىنىقتىرۋ ساباعىنان بوساتىلادى. بۇل تۋرالى دۇنيەجۇزىلىك گيمنازيادا – 2022 جەڭىمپازدارى مەن جۇلدەگەرلەرىن ماراپاتتاۋ راسىمىندە ءبىلىم جانە عىلىم ءمينيسترى اسحات ايماعامبەتوۆ مالىمدەدى، دەپ حابارلايدى Almaty-akshamy.kz BAQ.kz-كە سىلتەمە جاساپ.
«پرەزيدەنت 1 000 مەكتەپ سالۋ بويىنشا تاپسىرما بەرگەنىن بىلەسىزدەر. ەندى وسى مەكتەپتەردى جاڭا ۇلگىدە سالىپ جاتىرمىز. سونىڭ ىشىندە وسى مەكتەپتەر ءبىر ەمەس، بىرنەشە سپورت زالدارمەن جابدىقتالادى. ول بويىنشا جۇمىس ىستەپ جاتىرمىز. سونداي-اق جاڭا تيپتىك جوبالار دايىندالىپ جاتىر. بۇل دا ەلىمىزدەگى سپورتتى دامىتۋ ءۇشىن سەپتىگىن تيگىزەدى»، - دەدى اسحات ايماعامبەتوۆ.
سونىمەن قاتار ءبىلىم جانە عىلىم مينيسترلىگىنىڭ باسشىسى وقۋشىلار مەن ولاردىڭ جاتتىقتىرۋشىلارى ءجيى كوتەرىپ جۇرگەن ماسەلەگە توقتالدى.
«بىزدە اپتاسىنا 3 ساعات دەنە شىنىقتىرۋ ساباعى وتەدى. ەندى كۇندە، ءتىپتى اپتاسىنا 5-10 دايىندالىپ جۇرگەن وقۋشىلاردى، سپورتشىلاردى وسى پاننەن بوساتۋ نەمەسە ەرىكتى تۇردە قاتىسۋعا قاتىستى ۇسىنىس بولدى. بۇل ۇسىنىستى ءبىز (مينيسترلىك – اۆت.) زەرتتەدىك، جان-جاقتى قارادىق. ءقازىر ءتيىستى زاڭناماعا وزگەرىستەر ەنگىزىلىپ جاتىر. ەندى كۇندەلىكتى سپورتپەن اينالىسىپ جۇرگەن وقۋشىلارعا وسىنداي مۇمكىندىك بەرىلەدى»، - دەپ ءتۇسىندىردى اسحات ايماعامبەتوۆ وقۋشىلاردى ماراپاتتاۋ راسىمىندە.