الماتى اكىمدىگىندە قالا باسشىسى دارحان ساتىبالدىنىڭ توراعالىعىمەن بالالارعا ارنالعان عىلىم مۋزەيى جوباسىن جۇزەگە اسىرۋ جونىندە كەڭەس ءوتتى.
بۇل ورتالىق ازياداعى العاشقى ءبىلىم بەرۋ ورتالىعى بولماق، ول مەكتەپ وقۋشىلارى مەن جاس ۇرپاق اراسىندا عىلىمدى كەڭىنەن ناسيحاتتايتىن الاڭعا اينالادى، - دەپ حابارلايدى Aqshamnews.kz.
جوبا Singapore Science Centre Global حالىقارالىق فرانشيزاسى اياسىندا Kingsmen Exhibits كومپانياسىمەن بىرلەسە جۇزەگە اسىرىلىپ وتىر. بولاشاق مۋزەي ءبىلىم بەرۋ ورتالىعى عانا ەمەس، مەكتەپ، كوللەدج جانە ۋنيۆەرسيتەت باعدارلامالارىنا زاماناۋي عىلىمي جەتىستىكتەردى ەنگىزەتىن پلاتفورما بولماق.
كەڭەس بارىسىندا قۇرىلىس جۇمىستارىنىڭ قازىرگى بارىسى قارالدى. بۇگىندە بۇزۋ جۇمىستارى اياقتالۋعا جاقىن. سونىمەن بىرگە جوبالاۋ-سمەتالىق قۇجاتتاما ازىرلەنىپ، ينجەنەرلىك زەرتتەۋلەر قولعا الىنعان. عيمارات قۇرىلىمدارىن سەيسميكالىق تالاپتارعا سايكەس نىعايتۋ جۇمىستارى قىزعان. ونىمەن قاتار حالىقارالىق جانە جەرگىلىكتى ساراپشىلاردىڭ اتسالىسۋىمەن مۋزەيدىڭ ءبىلىم بەرۋ جانە كورمە مازمۇنى دايىندالىپ جاتىر. ينستيتۋسيونالدىق دامۋ ماسەلەسى قاراستىرىلىپ، حالىقارالىق ارىپتەسپەن ىنتىماقتاستىق باعىتتارى تالقىلانۋدا.
جوبانى جۇزەگە اسىرۋدىڭ مەرزىمى ايقىندالدى. قۇرىلىس-مونتاج جۇمىستارى 2026 جىلدىڭ ءساۋىر ايىندا اياقتالىپ، ماۋسىم ايىنا سالتاناتتى اشىلۋ ءراسىمى جوسپارلانعان.
دارحان ساتىبالدى جوبانىڭ ستراتەگيالىق ماڭىزىن اتاپ، جاۋاپتى باسقارمالارعا ءاربىر كەزەڭدى ساپالى تۇردە ورىنداۋدى تاپسىردى. مۋزەيدىڭ ۇزاق مەرزىمدى دامۋى ءۇشىن الماتى قالاسىنىڭ ءبىلىم باسقارماسى ستراتەگيالىق سالالىق كۋراتور بولىپ بەكىتىلدى. بۇل قادام جوباعا تۇراقتى دامۋ ميسسياسىن قامتاماسىز ەتىپ، بالالار مەن جاس بۋىن اراسىندا عىلىمدى دارىپتەۋگە، زەرتتەۋشىلىك قىزىعۋشىلىقتى قالىپتاستىرۋعا جانە بولاشاق ماماندىققا ەرتە باعدار بەرۋگە مۇمكىندىك بەرەدى.
جيىن سوڭىندا الماتى اكىمى عىلىم مۋزەيى ەلدىڭ فلاگماندىق جوباسىنا اينالاتىنىن، ول ءبىلىم، عىلىم مەن مادەنيەتتى بىرىكتىرىپ، وسكەلەڭ ۇرپاقتىڭ زەرتتەۋشىلىك ويلاۋىن دامىتىپ، بالالاردى زاماناۋي تەحنولوگيامەن تانىستىرىپ، ولاردىڭ زياتكەرلىك ءارى شىعارماشىلىق تۇرعىدا وسۋىنە جول اشاتىنىن اتادى.