الماتىعا الەمنىڭ ەڭ اتاقتى فۋتبول كلۋبتارىنىڭ ءبىرى «رەال مادريد» كەلدى. بۇل ساپار قالا ءۇشىن تاريحي وقيعاعا اينالدى، - دەپ حابارلايدى Aqshamnews.kz.
ورتالىق ستاديون مادريدتىك كوماندانى قابىلداۋعا ساقاداي-ساي دايىن: الاڭ حالىقارالىق ستاندارتتارعا ساي، جارىق بەرۋ جۇيەسى مەن ينفراقۇرىلىم تەكسەرىلدى. تورەشىلەر مەن ويىنشىلارعا بارلىق جاعداي جاسالعان، كيىم اۋىستىراتىن بولمەلەر جابدىقتالىپ، سپورتشىلاردىڭ جايلىلىعى ءۇشىن قاجەتتى نارسەلەرمەن قامتاماسىز ەتىلگەن.
ستاديوننىڭ ىشكى بەزەندىرىلۋىنە ەرەكشە كوڭىل ءبولىندى: تريبۋنالار جاڭارتىلدى، الماتى قالاسىنىڭ ايدەنتيكاسى مەن ستاديون ساۋلەتىنە ساي جاڭا كوركەم سۋرەتتەر جاسالدى. كورەرمەندەرگە ىڭعايلى بولۋ ءۇشىن 1،5 مىڭنان استام ورىندىق اۋىستىرىلدى، سانيتارلىق توراپتار جاڭارتىلىپ، قوسىمشا 60 بيودارەتحانا ورناتىلدى.
ماچ كەزىندە قوعامدىق ءتارتىپ پەن قاۋىپسىزدىكتى قامتاماسىز ەتۋگە الماتى قالاسى پوليسيا دەپارتامەنتىنىڭ 2 382 قىزمەتكەرى جۇمىلدىرىلادى. باقىلاۋ-وتكىزۋ بەكەتتەرىنە مەتالل دەتەكتورلار مەن قول سكانەرلەرى قويىلدى. ستاديون اۋماعىندا جەدەل جاردەم كولىكتەرى مەن ءورت ءسوندىرۋ بريگادالارى كەزەكشىلىك ەتەدى، ەۆاكۋاسيا جوسپارلارى مەن دابىل بەرۋ جۇيەسى تەكسەرىلدى.
ماچ اياقتالعان سوڭ جانكۇيەرلەردىڭ ۇيلەرىنە جايلى جەتۋى ءۇشىن 60 اۆتوبۋس ۇيىمداستىرىلادى. ولار اباي، ساتبايەۆ جانە بايتۇرسىن ۇلى كوشەلەرىمەن قوزعالىپ، التى باعىتتا قاتىنايدى:
* ورتالىق ستاديون – «الماتى ارەنا» – باتىس باعىتى؛
* ورتالىق ستاديون – رايىمبەك/الاتاۋ – باتىس باعىتى؛
* ورتالىق ستاديون – الماتى-1 تەمىرجول ۆوكزالى؛
* ورتالىق ستاديون – وربيتا شاعىناۋدانى؛
* ورتالىق ستاديون – جۇلدىز شاعىناۋدانى – شىعىس باعىتى؛
* ورتالىق ستاديون – اۋەجاي – شىعىس باعىتى.
وسىلايشا، «رەال ءمادريدتىڭ» الماتىعا كەلۋى ورتالىق ستاديوننىڭ جان-جاقتى دايىندىق جۇمىستارىمەن قاتار ءوتتى: الاڭ، جارىق، تريبۋنالار مەن ينفراقۇرىلىم جاڭارتىلدى، قاۋىپسىزدىك پەن كولىك قاتىناسى قامتاماسىز ەتىلدى. قالا تۇرعىندارى مەن قوناقتارى تاريحي وقيعانىڭ كۋاسى بولۋ ءۇشىن ءبارى الەمدىك ستاندارتقا ساي جاسالعان.