مەملەكەت باسشىسىنىڭ تاپسىرماسى بويىنشا 2025 جىلدان باستاپ قازاقستاندا قوسىمشا ءبىلىم بەرۋ ۇيىمدارىنا ۆاۋچەرلىك قارجىلاندىرۋ جۇيەسى كەزەڭ-كەزەڭىمەن ەنگىزىلۋدە.
ءبىرىڭعاي مەملەكەتتىك تاپسىرىستى ورنالاستىرۋدىڭ پيلوتتىق جوباسى استانا، اقتوبە، اتىراۋ، قاراعاندى، قىزىلوردا جانە شىمكەنت قالالارىندا جۇزەگە اسىرىلۋدا. جوبانىڭ ماقساتى – وقۋشىلاردى شىعارماشىلىق، سپورتتىق جانە ءبىلىم بەرۋ باعىتىنداعى تەگىن ۇيىرمەلەر مەن سەكسيالارمەن كەڭىنەن قامتۋ، - دەپ حابارلايدى Aqshamnews.kz
«بۇگىنگى كۇنى 300 مىڭنان استام بالا قوسىمشا بىلىمگە ۆاۋچەر الدى. اتا-انالار ءوز بالالارى ءۇشىن ۇيىرمەلەر مەن سەكسيالارعا وزدەرى تاڭدايدى. قاجەت بولعان جاعدايدا ولار قۇجاتتاردى قايتا تاپسىرماي-اق، ۇيىرمەنى وزگەرتە الادى. بۇل رەتتە ۆاۋچەر ساقتالادى»، – دەپ اتاپ ءوتتى تاربيە جانە قوسىمشا ءبىلىم بەرۋ دەپارتامەنتى باسقارماسىنىڭ باسشىسى التاي راحيمبەرلين.
قارجىلاندىرۋ «ءبىر بالاعا – ءبىر ۆاۋچەر» قاعيداتى بويىنشا بەرىلەدى. مۇنداي تەتىك بارلىق وقۋشىلار ءۇشىن تەڭ مۇمكىندىك جاساپ، اشىقتىقتى قامتاماسىز ەتەدى جانە بيۋدجەت قاراجاتىن ماقساتسىز پايدالانۋعا جول بەرمەيدى.
بۇل جوبا مادەنيەت جانە اقپارات، تۋريزم جانە سپورت، وقۋ-اعارتۋ، سونداي-اق جاساندى ينتەللەكت جانە سيفرلىق دامۋ مينيسترلىكتەرىمەن بىرلەسىپ جۇزەگە اسىرىلۋدا.