الماتى قالاسىنىڭ مۋزەيلەر بىرلەستىگىنە قاراستى مۋلتيمەديالىق ءداستۇرلى مۋزىكا ورتالىعىنا كۇيشى، دومبىراشى، قازاقستاننىڭ ەڭبەك سىڭىرگەن ءارتيسى راقىم تاجىبايەۆتىڭ دومبىراسى سالتاناتتى تۇردە قابىلداندى.
راقىم ءتاجىباي ۇلى 1946 جىلى مامىردا دۇنيەگە كەلگەن. 1955 جىلى جۇڭگو حالىق رەسپۋبليكاسىنان جەتىسۋ وبلىسىنىڭ اقسۋ اۋدانىنداعى ساعابۇيەن اۋىلىنا اتا-اناسىمەن بىرگە ورالادى. ورتا مەكتەپتى بىتىرگەن سوڭ الماتى قالاسىنداعى رەسپۋبليكالىق ەسترادا جانە سيرك كوللەدجىنە وقۋعا قابىلدانىپ، پروفەسسور قۇبىش مۇحيتوۆتىڭ سىنىبىندا ءدارىس الادى. سونىمەن قاتار تاريح ساحناسىندا ءوز ورنى بار رۇستەمبەك وماروۆ، ماعاۋيا حامزين، ءازيدوللا ەسقالييەۆتەردەن ءتالىم العان. كەيىنىرەك اباي اتىنداعى پەداگوگيكالىق ۋنيۆەرسيتەتىنىڭ مۋزىكا ءپانىنىڭ ءمۇعالىمى ماماندىعىن ءتامامداعان. وقۋ ورنىندا شاكىرت بولا ءجۇرىپ كۇيشى «قازاقكونسەرت» بىرلەستىگىمەن قاتار، «گۇلدەر» انسامبلىندە ونەر كورسەتەدى. سونىمەن قاتار «سامال»، «سەرپەر» انسامبلدەرىندە كوركەمدىك جەتەكشى ءارى جەكە ورىنداۋشىلىق قىزمەتتەرىن اتقارعان.
– راقاڭنىڭ قولىنىڭ ءىزى، سازى قالعان وسىناۋ كيەلى اسپاپتىڭ ەلىمىزدىڭ نەبىر ءدۇلدۇل ءانشى، جىرشى، كۇيشىلەرىنىڭ دومبىرالارىنىڭ ساپىنان ورىن العانىنا قۋانىشتىمىن. سوعان لايىقتى دەپ تانىپ جاتقان سىزدەرگە راحمەت ايتامىن. راقىم تاجىبايەۆتىڭ رەپەرتۋارىندا 150-دەن استام كۇيى بار. سونداي-اق، بىرنەشە دومبىرا سىنىبىن اشىپ، تالانتتى جاستاردى تاربيەلەۋدە ايرىقشا ەڭبەك ەتكەن تۇلعا. كۇي ونەرىنە وزىندىك قولتاڭباسىن قالدىرىپ، جاڭا بەلەسكە كوتەرگەن ول دومبىرانى دا كەرەمەت جاسايتىن شەبەر رەتىندە دە تانىمال بولدى. ونىڭ قوڭىر دومبىراسى مۋزەيگە امانات! – دەدى اسپاپتى مۋلتيمەديالىق ءداستۇرلى مۋزىكا ورتالىعىنىڭ جەتەكشىسى روزا ءجۇنىسقىزىنا تابىستاعان كۇيشىنىڭ جارى، ق ر مادەنيەت قايراتكەرى، ءانشى، تەرمەشى اجارگۇل تاجىبايەۆا.
رۋحاني ءىس-شارادا كۇيشى، دومبىراشى، قازاقستاننىڭ ەڭبەك سىڭىرگەن قايراتكەرى ءشامىل ءابىلتاي، «قۇرمەت» وردەنىنىڭ يەگەرى، ءداستۇرلى ءانشى رامازان ستامعازييەۆ ءسوز سويلەپ، كۇيشىنىڭ ونەردەگى جولىنان سىر شەرتىپ، ۇرپاققا قالدىرعان مۇراسىنىڭ ماڭگى جاساي بەرەتىنىن ايتتى. كەشكە قۇرمانعازىنىڭ «امان بول شەشەم، امان بول!»، «سەرپەر»، تاتتىمبەتتىڭ «كوكەيكەستى»، ءابدىمومىن جەلدىبايەۆتىڭ «ەركە سىلقىم» كۇيى، ابىكەن حاسەنوۆتىڭ «قوڭىرى»، جانىبەك كارمەنوۆتىڭ «ويلاماڭدار، جىگىتتەر» تەرمەسى كورىك بەردى.