قازىرگى ۋاقىتتا ادامداردان قايىرىم كەتىپ بارادى، قاتىگەزدەنىپ كەتتىك دەگەندى ءجيى ايتاتىن بولدىق. ءبىراق، جۇرەكتەرى ىزگىلىك پەن مەيىرىمدىلىككە تولى جانداردى كورگەندە، بۇل ءسوزىمىزدىڭ جانساق ايتىلعانىن مويىنداۋعا تۋرا كەلەدى. جاقسى ادامدار جانىمىزدا كوپ ەكەن. ونى الماتى قالالىق قوعامدىق دەنساۋلىق ساقتاۋ باسقارماسىنا قاراستى شارۋاشىلىق جۇرگىزۋ قۇقىنداعى «قالالىق قان ورتالىعى» كوممۋنالدىق مەملەكەتتىك مەكەمەسىنىڭ قۇرمەتتى دونورلارىن، ولارعا دەگەن تۇرعىنداردىڭ قۇرمەتىن كورگەندە انىق كوز جەتكىزدىك.
قان ارقىلى ادامعا ءومىر سىيلاۋدىڭ ۇلكەن ادامگەرشىلىك پەن ازاماتتىق، ىزگىلىكتى دە قايىرىمدى ءىس ەكەنىن بىلگەن ادامدار ءوز ەرىكتەرىمەن دونور بولۋعا كەلىسىم بەرىپ، ءتىپتى ونى وزدەرىنىڭ ومىرلىك قاعيدالارىنا اينالدىرىپ كەلە جاتقاندارى قانشاما؟! ال ونداي ادامدار الماتى قالاسىندا دا جەتەرلىك. 2005 جىلدان بەرى اتالىپ كەلە جاتقان بۇل كۇندى الماتى قالالىق قان ورتالىعى دا نازاردان تىس قالدىرماي، قايىرىمدى ءىس اتقارىپ جۇرگەن تۇراقتى دونورلارىنا قۇرمەت كورسەتىپ كەلەدى.
بيىل دا ورتالىق باسشىلىعى قۇرمەتتى دونورلارىنىڭ باسىن قوسىپ، قان ارقىلى ادامدارعا ءومىر سىيلاپ جۇرگەن ابزال ازاماتتارعا راقمەتتەرىن ايتىپ، قانعا مۇقتاج جانداردىڭ اتىنان العىستارىن جەتكىزدى.
دونورلاردى قۇرمەتتەۋگە ارنالعان سالتاناتتى جيىنعا الماتى قالاسى اكىمىنىڭ ورىنباسارى اسەم بەك قىزى ءنۇسىپوۆا، «امانات» پارتياسىنىڭ الماتى قالاسى بويىنشا فيليالىنىڭ ءتوراعاسى مەيىرجان وتىنشييەۆ، ءماسليحات دەپۋتاتتارى س.كونكۋروۆ، ا.قوداسبايەۆ، قالالىق قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى نازگۇل يمانعالييەۆا قاتىسىپ، دونورلارعا دەگەن ىستىق ءىلتيپاتتارىن ءبىلدىرىپ، ولاردى قالالىق قان ورتالىعىنىڭ العىس حاتى جانە باعالى سىيلىقتارىمەن، ورتالىق ارنايى شىعارعان «مەن دونورمىن!» توسبەلگىسىمەن ماراپاتتادى.
الماتى جۇرتىنىڭ قۇرمەتىنە بولەنگەن قۇرمەتتى دونورلاردىڭ قاتارىندا ۆ.پۋگاچيەۆ، م. شانجوس، ە.دياگيليەۆ، ە.ستۋپكو، ە. ابەنوۆ، ا. جۇما، ت.حۋدايەۆ، ن.اباي، م.بوروۆيكوۆ، ي.امانباي سەكىلدى تۇراقتى قان دونورلارى بار. دونورلاردى قۇتتىقتاعان الماتى قالاسى اكىمىنىڭ ورىنباسارى اسەم بەك قىزى ءنۇسىپوۆا:
- سىزدەر ءبىز ءۇشىن وتە قىمبات جانسىزدار. قان تاپسىرۋ ارقىلى قانشاما ادامعا، ونىڭ ىشىندە سابيلەر مەن ومىرگە پەرزەنت اكەلىپ جاتقان انالارعا، قانعا مۇقتاج ناۋقاس جاندارعا ءومىر ءسۇرۋ باقىتىن سىيلاپ جۇرسىزدەر، سول ەرلىكتەرىڭىزگە باس يەمىز، ءقادىرلى ءبىزدىڭ دونورلار. «راحمەت ساعان دونور!» دەگەن ادامداردىڭ جۇرەكجاردى العىسى سىزدەرگە دەگەن قۇرمەتتىڭ ۇلكەنى، امان بولىڭىزدار، قاتارلارىڭىز كوبەيسىن، - دەپ ءوزىنىڭ اقجارما تىلەگىن جولدادى.
جيىن سوڭىندا قالا اكىمىنىڭ ورىنباسارى، ءماسليحات دەپۋتاتتارى قان ورتالىعىن ارالاپ كورىپ، ورتالىقتىڭ كۇندەلىكتى اتقاراتىن جۇمىستارىمەن تانىستى. «امانات» پارتياسىنىڭ ءتورعاسى مەيىرجان وتىنشييەۆ باستاعان ءماسليحات دەپۋتاتتارى مەن فيليال قىزمەتكەرلەرى قان تاپسىرىپ، 14 ماۋسىم - دونورلار كۇنىنە وراي «امانات» پارتياسىنىڭ ناۋرىزباي اۋداندىق فيليالى باستاعان قالالىق «مەيىرىمدىلىك - قانىمىزدا!» اكسياسىنا ءوز قولداۋلارىن ءبىلدىردى. «مەيىرىمدىلىك قانىمىزدا» قالالىق اكسياسى قالامىزداعى «امانات» پارتياسىنىڭ بارلىق فيليالدارى مەن باستاۋىش ۇيىمدارىندا 16 ماۋسىمعا دەيىن جالعاسپاق. بۇل باستاماعا ءسىز دە ۇلەس قوسا الاسىز.
«قان تاپسىرىپ، ومىرگە سۇرۋگە ءۇمىت سىيلاڭىز!