«امانات» پارتياسىنىڭ ناۋرىزباي اۋداندىق فيليالى 14 ماۋسىم - دۇنيەجۇزىلىك دونورلار كۇنىنە وراي «مەيىرىمدىلىك قانىمىزدا!» اتتى قايىرىمدىلىق چەلەندجىن قولعا الدى. بۇل قايىرىمدىلىق ءىس-شاراسى 16 ماۋسىمعا دەيىن پارتيانىڭ الماتى قالاسىنداعى بارلىق اۋداندىق فيليالدارى مەن مەملەكەتتىك ۇيىمدارىندا جالعاساتىن بولادى.
ۇندەۋىنىڭ ءوزى ادامدى ىزگىلىككە باۋراپ تۇرعان بۇل قايىرىمدىلىق ءىس شاراعا «امانات» پارتياسىنىڭ اۋداندىق فيليالىمەن قاتار، اۋداننىڭ ءبىرقاتار مەملەكەتتىك مەكەمەلەرى دە قولداۋ ءبىلدىردى.
- ءبىز مۇنداي شارانى ءبىرىنشى رەت وتكىزىپ تۇرمىز، سوعان قاراماستان قان تاپسىرۋعا نيەت بىلدىرگەندەر سانى ءبىز ويلاعاننان الدەقايدا كوپ بولىپ شىقتى. سەكسەننەن اسقان قوعام جانە مەملەكەت قايراتكەرى، اۋداننىڭ قۇرمەتتى تۇرعىنى ءداريا سارقىتبايەۆا اپامىزدى، قازاقستان سپورتىنىڭ ماقتانىشى ەرماحان ىبىرايموۆ، الماتىنىڭ №1 مارافونشى قىزدارىنىڭ ءبىرى، كاسىپكەر، قالالىق قوعامدىق كەڭەس مۇشەسى، ناۋرىزباي اۋدانىنداعى «باقىتتى وتباسى» ورتالىعىنىڭ جەتەكشىسى سانا جاندايلاردى كورگەندە قاتتى قۋاندىق. ول كىسىلەردىڭ كەلىپ قان تاپسىرۋى - جاستارعا ۇلكەن ونەگە. ويتكەنى قان تاپسىرۋعا كەلگەندەردىڭ باسىم بولىگى - جاستار، – دەيدى «امانات» پارتياسىنىڭ ناۋرىزباي اۋداندىق فيليالىنىڭ ءتوراعاسى تىنىشقالي تورەعالي ۇلى سابەن.
سول كۇنى پارتيانىڭ كەڭسەسىنە 300-دەن استام پارتيا مۇشەسى مەن قايىرىمدىلىققا قانى جاقىن ادامدار قان تاپسىرىپ، وزدەرىنىڭ بۇل باستاماسىن باسقا اۋداندارعا جولدادى. مەيىرىمدىلىكتىڭ قانىمىزدا بارى راس، ولاي بولسا، ناۋرىزبايلىقتاردىڭ باستاماسىنان تىس قالماي، ۇندەۋگە ءۇن قوسىڭىزدار، اعايىن.