ەلىمىزدە ەڭ جوعارى ينفلياسيا تىركەلگەن وڭىرلەر انىقتالدى

ەلىمىزدە ءساۋىر ايىندا ازىق-تۇلىككە جاتپايتىن تاۋارلاردىڭ باعاسى 1،3%، ازىق-تۇلىك تاۋارلارى 0،9% قىمباتتادى.

ۇلتتىق ستاتيستيكا بيۋروسىنىڭ مالىمەتىنشە، اقىلى قىزمەتتەر 0،4% وسكەن، دەپ حابارلايدى Almaty-akshamy.kz.

ازىق-تۇلىككە جاتپايتىن تاۋارلاردىڭ ىشىندە ديزەل وتىنى (16،1%) مەن بەنزين (9،7%) قاتتى قىمباتتاعان.

ناۋرىز ايىمەن سالىستىرعاندا جۋۋ جانە تازالاۋ قۇرالدارى – 1،4%، جەكە گيگيەنا قۇرالدارى – 1،1%، ىدىس-اياق – 1%، تۇرمىستىق تەحنيكا 0،9% ءوستى.

ازىق-تۇلىك تاۋارلارى اراسىندا جەمىس پەن كوكونىس باعاسى ەداۋىر وسكەن.

«ساۋىردە قىرىققابات – 4،7%، قىزاناق – 4،1%، ءجۇزىم – 3%، الما – 2،6%، المۇرت 2،4% قىمباتتاعان. باعانىڭ ءوسۋى كۇرىشكە – 2،7%، سالقىنداتىلعان سۋسىندارعا – 2،5%، روجكيلەرگە، ۋلتراپاستەرلەنگەن سۇتكە – ءارقايسىسى 2،4%-دان، سالقىنداتىلعان بالىققا – 2،2%، پاستەرلەنگەن ءسۇت، ماكارون ونىمدەرىنە – ءارقايسىسى 2،1%-دان بايقالدى. بۇل رەتتە قيار – 11،4%، قاراقۇمىق جارماسى – 3،7%، كۇنباعىس مايى 2،6%-عا ارزاندادى»، - دەلىنگەن مالىمەتتە.

ال وڭىرلەر اراسىندا ەڭ جوعارى ايلىق ينفلياسيا اباي جانە ۇلىتاۋ وبلىستارىندا تىركەلگەن – ءارقايسىسىندا 1،4%-دان. ەڭ تومەنگى ءوسىم استانا قالاسىندا تىركەلدى – 0،5%.

«وڭىرلەر بويىنشا ازىق-تۇلىك تاۋارلارى باعاسىنىڭ ەڭ جوعارى ءوسىمى باتىس قازاقستان وبلىسىندا – 1،8%، ازىق-تۇلىككە جاتپايتىن تاۋارلار بويىنشا الماتى وبلىسىندا – 3%، اقىلى قىزمەتتەردە تۇركىستان وبلىسىندا – 2،3%»، - دەلىنگەن مالىمەتتە.